06.10.2026 | 21:03
24 ժամ ջուր չի լինի Դիլիջանի մի շարք հասցեներում
Շուրջ 500 մլն դրամ՝ 200 հազար հատ մանրաձկան համար․ որքանով է արդյունավետ Սևանում իշխանի պաշարների վերականգնման ծրագիրը
20.06.2024 | 15:41
Կառավարությունը Սևանի ձկնապաշարների լրացման նպատակով պարբերաբար լիճ է բաց թողնում իշխանի մանրաձուկ։ Այս տարվա համար նախատեսված 200 հազար հատ իշխանի մանրաձկան քանակից արդեն 87300 հատ բաց է թողնվել Սևանա լիճ, այս մասին Factor.am-ի գրավոր հարցմանն ի պատասխան տեղեկացրել են Շրջակա միջավայրի նախարարությունից։ 200 հազար մանրաձկան համար պետությունը 495 մլն 700 հազար դրամ է տրամադրել, ստացվում է՝ մեկ մանրաձուկն արժեցել է 2 478,5 դրամ։
Ըստ նախարարության տրամադրած տվյալների՝ 2022 թվականին Սևանա լիճ է բաց թողնվել 15577 հատ մանրաձուկ, որից 163000 հատը գեղարքունի տեսակի, իսկ 15577-ը՝ ամառային։
Վիճակագրությունից պարզ է դառնում, որ հաջորդ տարի իշխանի մանրաձկան բաց թողնման ծավալներն ավելացել են․ 2023-ին 231732 հատ գեղարքունի տեսակի իշխանի մանրաձուկ է լցվել Սևան, թե ամառային տեսակի իշխանի քանի մանրաձուկ է բաց թողնվել՝ հարցման պատասխանում չի նշվում։
ՇՄՆ-ի փոխանցմամբ՝ ընդհանուր առմամբ վերջին երեք տարվա ընթացքում 497609 հատ իշխանի մանրաձուկ է բաց թողնվել Սևանա լիճ։ Կառավարությունը Սևանա լճում իշխանի պաշարների վերականգնման համար 2022 թվականին հատկացրել է 300 մլն դրամ, 2023-ին և 2024-ին՝ 495-ական մլն դրամ։
Նախարարությունից նաև տեղեկացրել են, որ գումարները տրամադրվում են «Սևանի իշխանի պաշարների վերականգնման և ձկնաբուծության
զարգացման հիմնադրամին» Սևանի իշխանի գեղարքունի և ամառային ենթատեսակների մայրական ու փոխարինող կազմի ստեղծման, պահպանման և դրանից ստացված մանրաձկան աճեցման և բացթողնման նպատակով:
Նախարարությունից այդպես էլ չեն հստակեցրել, թե որքան գումար է ծախսվում իշխանի մեկ մանրաձուկ գնելու համար, և ինչ մեթոդաբանությամբ է հաշվարկվում՝ ամեն տարի ինչքան մանրաձուկ է անհրաժեշտ բաց թողնել լիճ՝ իշխանի պաշարների վերականգնման համար։ ՇՄՆ-ն հորդորել է այս հարցերի պատասխանները ստանալ «Սևանի իշխանի պաշարների վերականգնման և ձկնաբուծության
զարգացման հիմնադրամ»-ից։
Նշենք, որ «Սևանի իշխանի պաշարների վերականգնման և ձկնաբուծության զարգացման հիմնադրամ»-ը ստեղծվել է 2013 թվականին կառավարության որոշմամբ։
Ըստ իրավաբանական անձանց պետական ռեգիստրի՝ (e-register) հիմնադրամի գործադիր տնօրենը Դավիթ Շանոյանն է։
Ի դեպ, մեր գրավոր հարցմանն ի պատասխան նաև հայտնել են, որ լիճ իշխանի մանրաձկան բացթողնման համար գնման մրցույթ չի հայտարարվում։
Մանյա Պողոսյան
