Բրյուսելի գագաթնաժողովում ԵՄ ղեկավարության թեկնածուների հարցում չի հաջողվել համաձայնության գալ

Բրյուսելում ԵՄ գագաթնաժողովի մասնակիցները չեն կարողացել վերջնական համաձայնության գալ Եվրամիության նոր ղեկավարության նշանակման հարցով։ Այս մասին հայտարարել է Եվրոպական խորհրդի նախագահ Շառլ Միշելը, գրում է DW-ի ռուսական ծառայությունը։

Ըստ dpa գործակալության աղբյուրների՝ դիվանագետների շրջանում տարաձայնությունների պատճառներից մեկն այն էր, որ աջ կենտրոնամետ Եվրոպական ժողովրդական կուսակցության (ԵԺԿ) ներկայացուցիչները, որոնց թվում են Գերմանիայի Քրիստոնեա-դեմոկրատական ​​միությունը (CDU) և Քրիստոնեա-սոցիալական միությունը (CSU), ցանկանում էին հասնել նրան, որ Եվրոպական խորհրդի նախագահի պաշտոնում նշանակումը միանգամից հինգ տարով չամրագրվի։ Դա կնշանակեր, որ տեսականորեն ԵԺԿ-ն կարող է այդ պաշտոնին հավակնել 2,5 տարուց։ Սոցիալ-դեմոկրատները, սակայն, համաձայն չեն եղել այս առաջարկի հետ։

Հունիսին կայացած Եվրախորհրդարանի ընտրություններում ԵԺԿ-ն դարձել է ամենաուժեղ քաղաքական ուժը։ Այդ պատճառով հավանական էր համարվում, որ նրա առաջատար թեկնածուն՝ Ուրսուլա ֆոն դեր Լեյենը, կարող է մնալ ԵՄ հանձնաժողովի նախագահի պաշտոնում ևս հինգ տարի:

Արտաքին քաղաքականության և անվտանգության հարցերով ԵՄ բարձր ներկայացուցչի պաշտոնի ֆավորիտը Էստոնիայի վարչապետ Կայա Կալլասն է, իսկ Պորտուգալիայի նախկին վարչապետ Անտոնիո Կոստայի թեկնածությունը՝ Եվրախորհրդարանի մեծությամբ երկրորդ խմբակցության՝ սոցիալ-դեմոկրատներից, քննարկվում է Եվրոպական խորհրդի նախագահի պաշտոնում։

ԵՄ անդամ պետությունների ու կառավարությունների ղեկավարների հաջորդ հանդիպումը տեղի է ունենալու հաջորդ շաբաթվա վերջին։ Դրա ընթացքում կրկին քննարկվելու է Եվրամիության բարձրագույն պաշտոնների թեկնածուների հարցը։