05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
ԲԴԽ-ն մերժեց Աննա Դանիբեկյանի կողմից Կարեն Անդրեասյանին և խորհրդի մյուս անդամներին ներկայացված ինքնաբացարկի միջնորդությունները
Հասարակություն
17.06.2024 | 10:57
Բարձրագույն դատական խորհուրդը քիչ առաջ մերժեց ԲԴԽ նախագահ Կարեն Անդրեասյանին և խորհրդի մյուս անդամներին դատավոր Աննա Դանիբեկյանի կողմից ներկայացված ինքնաբացարկի միջնորդությունները
Նախորդ շաբաթ ԲԴԽ-ում սկսվել է Դանիբեկյանի կարգապահական գործի քննությունը, որով Արդարադատության նախարարությունը միջնորդել է կարգապահական պատասխանատվության ենթարկել Դանիբեկյանին «Ռոբերտ Քոչարյանի գործը ձգձգելու համար»:
Կարգապահական վարույթը հարուցվել է այն բանից հետո, երբ ԲԴԽ աշխատակազմ Դատական դեպարտամենտը հրապարակել է ֆիլմ և Դանիբեկյանին «մեղավոր ճանաչել» Քոչարյանի գործը տապալելու մեջ: Այս ֆիլմը տարածել են մի շարք լրատվամիջոցներ, և, դրանցից մեկի հրապարակումը հիմք ընդունելով, Արդարադատության նախարարությունը հարուցել է վարույթ:
Նշենք, որ մինչ ֆիլմի հրապարակումը ԲԴԽ նախագահ Կարեն Անդրեասյանը Հանրային հեռուստաընկերությանը տված հարցազրույցում խոսել էր այն մասին, որ ինքը Դատական դեպարտամենտի իր գործընկերներին խնդրել է 5 ձգձգվող գործերի վերաբերյալ ֆիլմ պատրաստել, և պարզել, թե ովքեր են մեղավոր այս գործերի ձգձգման համար: Այս ֆիլմերից մեկը հենց Քոչարյանի գործի վերաբերյալ է եղել:
ԲԴԽ նախորդ նիստին Դանիբեկյանը, մեջբերելով Կարեն Անդրեասյանի հարցազրույցի բովանդակությունը, նշել էր, որ Անդրեասյանը կանխակալ վերաբերմունք ունի ԲԴԽ-ում քննվող իր գործի նկատմամբ: Բացի այդ` Դանիբեկյանն ինքնաբացարկի միջնորդություններ էր ներկայացրել նաև խորհրդի մյուս անդամներին` բացի նորընտիր անդամներ Արմեն Դանիելյանի և Մերի Համբարձումյանի:
Խորհուրդը, սակայն, գտել է, որ իրենց անդամներից որևէ մեկը կանխակալ չէ, Անդրեասյանն էլ Հանրային հեռուստաընկերությանը տված հարցազրույցում կանխակալ վերաբերմունք չի արտահայտել Աննա Դանիբեկյանի վերաբերյալ:
Այսօրվա նիստի ընթացքում դատավոր Աննա Դանիբեկյանը նշեց, որ ինքը Դատական դեպարտամենտի մշտադիտարկման գործառույթի վերաբերյալ հարցում է ուղարկել, և այս պահի դրությամբ դեռևս դրա պատասխանը չի ստացել, ուստի միջնորդեց հետաձգել նիստը, մինչև պատասխանը կստանա: Խորհուրդը միջնորդությունը բավարարեց:
Հաջորդ նիստի օրվա և ժամի վերաբերյալ կողմերը լրացուցիչ կծանուցվեն:
Արաքս Մամուլյան
