Տեսախցիկներով հսկողություն՝ ՀՀ ողջ տարածքում․ ինչ ռիսկեր է պարունակում ոստիկանության նոր նախագիծը. ՏԵՍԱՆՅՈՒԹ

Հայաստանի ամբողջ տարածքում հսկողության տեսախցիկներ կարող են հայտնվել․ Ներքին գործերի նախարարությունը մտադիր է նման պահանջ սահմանել խոշոր տնտեսվարող սուբյեկտների և ընկերությունների նկատմամբ։ Տեսախցիկների հսկողությունն ամբողջությամբ կտրվի ՆԳՆ ենթակայության ՊՈԱԿ-ին։

«Ոստիկանության մասին» օրենքում նման փոփոխություն մասին ԱԺ պաշտպանության և անվտանգության մշտական հանձնաժողովի նիստում հայտարարել էր ներքին գործերի փոխնախարար Արփինե Սարգսյանը։

Խոսքը վերաբերում է բանկերին, վարկային հաստատություններին, գրավատներին, դեղատներին, առանձին մուտքով տարադրամի փոխանակման կետերին, փոստային բաժանմունքներին, ուսումնական հաստատությունների արտաքին տարածքներին։ Տեսախցիկներ տեղադրելու պարտավորություն կունենան նաև ավելի քան 100 քմ մակերեսով մանրածախ օբյեկտները, վառելիքի վաճառքի կետերը և հանրային սննդի՝ ավելի քան 50 քմ տարածքով օբյեկտները։ Տեսախցիկների առկայությունը պարտադիր է լինելու նաև շտապօգնության մեքենաների, ինչպես նաև ավտոբուսների և միկրոավտոբուսների համար։

Փողոցային տեսախցիկների ցանցի անվտանգությունից մինչև անձնական տվյալների պաշտպանություն․ մեդիափորձագետ Արթուր Պապյանը մի շարք խնդիրներ է մատնանշում ոստիկանության կողմից առաջարկվող օրենսդրական փոփոխության հետ կապված։

Պապյանը հիշեցնում է 2020 թվականի հաքերային հարձակումները, երբ ադրբեջանցիները հասանելիություն էին ստացել հայաստանյան փողոցային տեսախցիկների ցանցին։ Մեդիափորձագետը հարց է բարձրացնում․ եթե այն ժամանակ ադրբեջանցիները հեշտորեն կարողացել են կոտրել փողոցային տեսախցիկների ցանցը, ի՞նչ հետևանքներ կլինեն այն դեպքում, եթե Հայաստանի ամբողջ տարածքի տեսահսկումը խոցելի լինի։

Ներքին գործերի նախարարությունից Factor TV-ին փոխանցեցին, որ 2020-ին Երևանի փողոցները տեսահսկող սարքերի աշխատանքը համակարգվել է ոչ թե ոստիկանության, այլ մասնավոր ընկերության կողմից։

Չնայած նախարարությունը նշում է, որ չի պատրաստվում վերահսկել քաղաքացիներին և նոր օրենսդրական փոփոխությունը միտված է հանցանքները բացահայտելուն ու կանխելուն, Պապյանը, սակայն, կարծում է՝ տեսախցիկների առկայությունը վտանգում է անձնական կյանքի գաղտնիությունը։

Մանրամասները՝ տեսանյութում։

Անի Թամրազյան