12.03.2026 | 22:08
Թուրքիան դեմ է Իրանում քաղաքացիական պատերազմ հրահրելու ցանկացած ծրագրի. Ֆիդան
Հայաստանն առաջին անգամ ՄԱԿ-ում կողմ է քվեարկել Աբխազիայի և Հարավային Օսիայի վերաբերյալ Վրաստանի բանաձևին
Քաղաքականություն
05.06.2024 | 12:34
ՄԱԿ-ի Գլխավոր վեհաժողովը նախօրեին ձայների 103 կողմ, 9 դեմ և 52 ձեռնպահ հարաբերակցությամբ վերահաստատել է բոլոր տեղահանվածների և փախստականների՝ Վրաստանի Աբխազիա և Ցխինվալ/Հարավային Օսիա շրջաններ վերադարձի իրավունքը, գրում է civil.ge-ն։
Բանաձևի օգտին ձայների թիվը 100-ից հասել է 103-ի նախորդ տարվա համեմատ։ Առաջին անգամ բանաձևին կողմ են քվեարկել Հայաստանը, ինչպես նաև Արգենտինան և Հարավաֆրիկյան Հանրապետությունը։
Նշենք, որ 2009-2018 թվականներին Հայաստանը դեմ է քվեարկել բանաձևին, 2019-2023-ին՝ չի մասնակցել քվեարկությանը։
Նախօրեին տեղի ունեցած քվեարկությանը, բացի Ռուսաստանից, բանաձևին դեմ են քվեարկել նաև Բելառուսը, Բուրունդին, Կուբան, Մալին, Նիկարագուան, Հյուսիսային Կորեան, Սիրիան և Զիմբաբվեն։
Հայաստանում Վրաստանի դեսպան Գեորգի Շարվաշիձեն շնորհակալություն է հայտնել Երևանին այս քվեարկության համար։
«Վրաց-հայկական ռազմավարական գործընկերության ևս մեկ մեծ թռիչք։ Շնորհակալություն ՄԱԿ-ի Գլխավոր վեհաժողովի բանաձևին Հայաստանի աջակցության համար»,- գրել է դեսպանը X-ի իր միկրոբլոգում՝ նշելով ՀՀ վարչապետ Նիկոլ Փաշինյանին, նախագահ Վահագն Խաչատուրյանին և ԱԳ նախարար Արարատ Միրզոյանին։
