16.09.2026 | 13:25
Ուկրաինայի պատերազմում զոհվել է ռուս գեներալը, որը Պուտինին զեկուցել էր Կոստանտինովկայի «գրավման» մասին
Գալուզինը հայտարարել է, թե «Հայաստանը խուսափում է ՌԴ ԱԳՆ-ի և ՊՆ-ի հետ շփումներից»
Քաղաքականություն
05.06.2024 | 11:06
Հայաստանը դադարել է հետաքրքրություն ցուցաբերել Ռուսաստանի արտաքին գործերի և պաշտպանության նախարարությունների գծով շփումների նկատմամբ, ինչը Արևմուտքի ճնշման արդյունքն է։ Այս մասին ՏԱՍՍ-ին տված հարցազրույցում հայտարարել է ՌԴ ԱԳ փոխնախարար Միխայիլ Գալուզինը։
«2023 թվականի նոյեմբերից ի վեր արտգործնախարարների հանդիպումներ չեն եղել: Գործընկերները հետաքրքրություն չեն ցուցաբերել մեր առաջարկի նկատմամբ՝ մշակել և կնքել արտաքին գործերի միջնախարարական խորհրդակցությունների հերթական ծրագիրը։ Մեր մեղավորությամբ չէ, որ նվազել է պաշտպանական գերատեսչությունների միջև շփումների դինամիկան։ Նվազել է նաև ռազմատեխնիկական համագործակցությունը։ Դրանում տեսնում ենք Արևմուտքի ճնշման արդյունքը, որը փորձում է Երևանին ստիպել նվազագույնի հասցնել մեր երկրի հետ կապերը»,- ասել է Գալուզինը։
Նա հավելել է, թե հույս ունեն, որ «ՀՀ իշխանությունների հրապարակային հնչեցված մտադրությունը խնդիրների շուրջ աշխատելու վերաբերյալ գործնականում կկիրառվի, և իրենք պատրաստ են դրան»։
Գալուզինը նաև նշել է, որ երկկողմ շփումները Մոսկվայի ու Երևանի միջև չեն դադարում։ Նա ընդգծել է, որ մայիսի 8-ին Եվրասիական բարձրագույն տնտեսական խորհրդի հերթական նիստի շրջանակում մանրամասն զրույց է տեղի ունեցել ՌԴ նախագահ Վլադիմիր Պուտինի և ՀՀ վարչապետ Նիկոլ Փաշինյանի միջև։ ՌԴ վարչապետ Միխայիլ Միշուստինն էլ փետրվարին է հանդիպել իր հայ գործընկերոջ հետ։
«Ավելի էական արդյունքները մեզ մոտ առևտրատնտեսական ոլորտում են։ Տնտեսական համագործակցության երկկողմ միջկառավարական հանձնաժողովն արդյունավետ է աշխատում։ Նրա համանախագահները՝ Ռուսաստանի փոխվարչապետ Ալեքսեյ Օվերչուկը և Հայաստանի փոխվարչապետ Մհեր Գրիգորյանը, պարբերաբար շփվում են, այդ թվում՝ ԵՏՄ-ի հանդիպումների շրջանակում։ Մենք համագործակցում ենք հայ գործընկերների հետ մշակութային և հումանիտար ուղղությամբ»,- հայտարարել է ՌԴ ԱԳ փոխնախարարը։
