21.01.2026 | 23:30
Ինչ իրավիճակ է Հայաստանի ճանապարհներին և Լարսում
Ինչո՞ւ են մաքսային մարմինները ծառայությունների գները 70 ցենտից թանկացրել 2 դոլարով․ ՊԵԿ-ը պարզաբանում է
Տնտեսություն
29.08.2018 | 19:22
Ինչպես ավելի վաղ տեղեկացրել ենք, այսօր Ազգային ժողովում «Ծառուկյան» խմբակցության պատգամավոր Սերգեյ Բագրատյանը հայտարարեց, որ մաքսային մարմինները թանկացրել են իրենց ծառայությունները, ինչի հետևանքով փոքր և միջին բիզնեսի բազմաթիվ ներկայացուցիչներ հայտնվել են խնդիրների առաջ։
«Եթե նախկինում այդ արատավոր պրակտիկան, որ կար, իրականացվում էր «ՆորՖոլկի» միջոցով, կարողացաք լուծել, հիմա առաջացել են նոր խնդիրներ։ Մաքսային սահմանն անցնելու համար մատուցվող ծառայությունը մեկ կիլոգրամի համար թանկացել է երկու դոլարով․ եթե նախկինում մաքսազերծումը և մինչև կարգո հասցնելն արժենում էր 70 ցենտ, հիմա երկու դոլարով թանկացել է»,-ասել էր պատգամավորը։
Թե ինչով է պայմանավորված այս թանկացումը Factor.am-ը փորձեց պարզել Պետական եկամուտների կոմիտեից։
ՊԵկ տեղեկատվության և հասարակայնության հետ կապերի բաժնից հայտնեցին, որ «Նորֆոլկ Քոնսալթինգ» ՍՊ ընկերությունը դադարեցրել է իր գործառույթների իրականացումը, և իրավահաջորդության կարգով նույն գործառույթներն իրականացնող որևէ այլ ընկերություն, այդ թվում՝ պետական մասնակցությամբ, չի ստեղծվել և չի ստեղծվելու։
«Այսուհետ բոլոր տնտեսվարող սուբյեկտները մաքսային մարմիններում իրենք են հանդես գալու որպես ներմուծված ապրանքների հայտարարատու: Միաժամանակ, ՊԵԿ–ը հայտարարում է, որ Կոմիտեի կազմում ձևավորվել է 2 նոր՝ գանձումների և ձևակերպումների ստորաբաժանում, որոնք ստեղծվել են տնտեսվարողներին մաքսային ձևակերպումների գործընթացում օժանդակելու նպատակով: ՊԵԿ-ը նաև հայտարարում է, որ բոլոր ներմուծված ապրանքների մաքսային գործընթացներն իրականացվելու են բացառապես մաքսային օրենսդրությամբ սահմանված կարգով»,- ասված է պարզաբանման մեջ։
Աղավնի Սուքիասյան
