06.04.2026 | 23:30
Հրդեհ Թաիրով բնակավայրում. այրվել է ավտոմեքենա
Վանի Աղթամար կղզու Սբ Խաչ եկեղեցին պատրաստվում է պատարագի
Մշակույթ
29.08.2018 | 16:04
Վան նահանգի Գևաշի շրջանում շարունակվում են Աղթամար կղզու հայկական Սուրբ Խաչ եկեղեցու սեպտեմբերի 9-ին մատուցվելիք պատարագի պատրաստությունները: Երեք տարվա դադարից հետո եկեղեցին նորից կբացի իր դռները հավատացյալ հոտի առաջ. փոխանցում է ermenihaber-ը:
Պատարագի նախապատրաստական աշխատանքները համակարգվում են Վանի նահանգապետարանի կողմից` համապատասխան հաստատությունների մասնակցությամբ:
Վանի տուրիզմի զարգացման տեսանկյունից կարևոր նշանակություն ունեցող Սբ. Խաչ եկեղեցում այս տարի մատուցվող պատարագի առթիվ զբոսաշրջիկների մեծ հոսք է ակնկալվում:
Աղբյուրը նշում է, որ Վանում ամբողջությամբ սպառվել է հյուրանոցների ամրագրման հնարավորությունը: Վան են այցելելու, թե’ ներքին տուրիզմով հետաքրքրվողները և թե’ արտասահմանցի զբոսաշրջիկները, մասնավորպես Հայաստանից և Իրանից:
Վանի առևտրաարդյունաբերեկան պալատը զգուշացումներ է արել առևտրականներին ծառայությունների մատուցման և գնագոյացման հարցերում:
Պալատի ներկայացուցիչ Ֆարուք Բիները նշել է, որ Վանը «հոգևոր տուրիզմի» համար կարևոր կենտրոն է:
Նա հորդորել է տեղացի և արտասահմանցի զբոսաշրջիկների հանդեպ հարգալից լինել և անպայման ուշադրություն դարձնել սպասարկման որակին, գներին ռեստորաններում, սրճարաններում, հյուրանոցներում և առևտրային կենտրոններում:
«Մեր նահանգում այնպիսի ուրախ միջավայր պետք է ստեղծենք, որ մյուս տարիներին ավելի մեծանա զբոսաշրջիկների թիվը: Բոլորն իրենց հնարավորության սահմաններում պետք է աջակցեն, որպեսզի Վանը դառնա կրոնական, տուրիստական և առևտրային կենտրոն»:
