11.12.2024 | 11:14
Ադրբեջանի և Հայաստանի միջև խաղաղության հաստատման հարցում հասել ենք ամենամոտ կետին․ Հաքան Ֆիդան
Աղետի գոտի․ Լոռիում և Տավուշում վնասները գույքագրվում են․ կառավարությունը 300 մլն դրամ կհատկացնի. ՏԵՍԱՆՅՈՒԹ
Հասարակություն
28.05.2024 | 20:04
Լոռու և Տավուշի մարզերի մի շարք համայնքներ հայտարարվել են աղետի գոտի։ Ավերիչ հեղեղումների հետևանքները հաշվի առնելով՝ կառավարությունը նման որոշում է ընդունել․ աղետի գոտին ներառում է 6 համայնք Լոռիում, ևս 3-ը՝ Տավուշում։
Այդ համայնքների հրատապ խնդիրների լուծման համար կառավարությունը 300 մլն դրամ է նախատեսում։ Տարածքային կառավարման և ենթակառուցվածքների նախարար, արտակարգ իրավիճակի կապակցությամբ ստեղծված օպերատիվ շտաբի ղեկավար Գնել Սանոսյանը հայտնել է, որ գումարը տրվելու է մարզպետարաններին և պարբերաբար ավելացվելու է, քանի որ, ըստ Սանոսյանի, վերականգման աշխատանքների համար միլիարդավոր դրամների կարիք կլինի։
Լոռու և Տավուշի մարզերում այս պահին վնասների գույքագրում է իրականացվում։ Մինչ կիրականացվի կառավարության գույքագրումն ու հստակ կլինի փոխհատուցման չափը, աղետի գոտում գտնվող քաղաքացիները փորձում են սեփական ուժերով վերացնել պատճառած վնասները։ Լոռու մարզի Քարկոփ գյուղի բնակիչն էլ Factor TV-ին պատմում էր, թե ինչպես է կամրջի փլուզման հետևանքով գյուղը երկու մասի բաժանվել։ M6 ավտոճանապարհի Վանաձոր-Ալավերդի հատվածում բեռնատարի վարորդն էլ մեզ հետ զրույցում պատմում էր, թե ինչպես է ամբողջ գիշեր հոր հետ բեռնատարի տանիքին անցկացրել։
Դեբեդ գետի վարարման հետևանքով մայիսի 26-ից չեղարկվել են Երևան-Թբիլիսի-Երևան երթուղով միջազգային գնացքները։ Տարածքային կառավարման և ենթակառուցվածքների նախարար Գնել Սանոսյանն Այրում կայարանում Հարավկովկասյան երկաթուղիներ ՓԲԸ ղեկավարության հետ քննարկել է ստեղծված իրավիճակում հնարավոր լուծումները։
Հեղեղումներից հետո հայտնաբերվել է 4 դի, կան փլուզված կամուրջներ և ճանապարհներ, մեկուսացման մեջ հայտնված բնակավայրեր։ ԱԺ «Քաղաքացիական պայմանագիր» խմբակցության պատգամավոր Արեն Մկրտչյանը երեկ հայտնել էր, որ հեղեղի հետևանքով 18 կամուրջ ամբողջությամբ կամ մասնակի փլուզված է։ Այսօր էլ մասնակի փլուզվել է Իջևան համայնքի Խաշթառակ բնակավայր տանող կամուրջը։ Այս պահին երթևեկությունը կամրջով արգելված է, իսկ հին շրջանցիկ ճանապարհը երթևեկելի դարձնելու ուղղությամբ աշխատանքներ են իրականացվում։ Երեկվա դրությամբ՝ աղետի գոտուց տարհանվել է ավելի քան 430 բնակիչ։
Մանրամասները՝ տեսանյութում։
Անի Թամրազյան
