07.07.2026 | 14:13
Կադաստրային արժեքը մոտ 4,6 մլրդ դրամ․ ՀՀ-ի տիրապետմանն է վերադարձվել Դիլիջանում գտնվող հողամասը․ Փաշինյան
Փարաքարի համայնքապետը հրաժարական է ներկայացրել․ նրան անվստահություն էր հայտնել «Ապրելու երկիրը»
Քաղաքականություն
22.05.2024 | 12:10
Փարաքար խոշորացված համայնքի ղեկավար ը հրաժարական է ներկայացրել։ Մինասյանն այդ մասին հայտնել է ֆեյսբուքյան գրառմամբ։
«Հայտարարում եմ, որ ավագանու «Դավիթ Մինասյան» խմբակցության արդեն նախկին անդամ Էմին Երիցյանը խախտել է քաղաքական պայմանավորվածությունը՝ միանալով Փարաքար համայնքի ղեկավարին անվստահություն հայտնելու գործընթացին: Իբրև հուսալի գործընկեր՝ ստեղծված իրավիճակի մասով կրում եմ քաղաքական պատասխանատվություն և հրաժարական եմ ներկայացնում Փարաքար համայնքի ղեկավարի պաշտոնից՝ պաշտպանելով համայնքի ղեկավարի պաշտոնում «Քաղաքացիական պայմանագիր» խմբակցության անդամ Լյուդվիգ Գյուլնազարյանի թեկնածությունը»,- գրել է արդեն նախկին ղեկավարը։
Հիշեցնենք, որ Մինասյանը Փարաքարի համայնքապետ էր ընտրվել 2022 թվականի հունվարի 9-ին։ Ըստ պայմանավորվածության՝ համայնքը 2.5 տարի պետք է ղեկավարեր Դավիթ Մինասյանը, հաջորդ 2,5 տարին՝ ՔՊ-ի թեկնածու Լյուդվիգ Գյուլնազարյանը:
2021 թվականին կայացած ՏԻՄ ընտրություններում ամենաշատ՝ 4637 քվե ստացած «Ապրելու երկիր» կուսակցությունն է երեկ Դավիթ Մինասյանին անվստահություն հայտնելու գործընթաց սկսել։ Այս մասին ֆեյսբուքյան գրառմամբ տեղեկացրել է «Ապրելու երկիր» կուսակցության համահիմնադիր Մեսրոպ Առաքելյանը։ «Փաստաթղթերը ներկայացնելուց մի քանի ժամ անց համայնքի ղեկավարը հրաժարական տվեց»,- գրել է նա։
Փարաքարի ավագանին իր կազմից նոր ղեկավար պիտի ընտրի։
Արփի Հակոբյան
