Քաղաքականություն
21.05.2024 | 20:00Այսօր Կիրանցում չափագրական աշխատանքներ են կատարվել նոր ճանապարհների կառուցման հետ կապված։ Միաժամանակ, ԱԱԾ-ն հայտնել էր, որ սահմանապահ զորքերը Կիրանցի հատվածում իրականացնում են սահմանի պահպանությունը ստանձնելուն ուղղված նախապատրաստական աշխատանքներ: Կառավարությունը խոստանում է Կիրանցի հատվածում երկու ամսում նոր ճանապարհ կառուցել, ինչպես նաև՝ հատուցել գույքային վնաս կրող գյուղացիներին, որոնցից որոշների տներ, ըստ երևույթին, կանցնեն Ադրբեջանի վերահսկողության տակ։
Քաղաքագետ Սամվել Մելիքսեթյանը Factor TV-ի հետ զրույցում ասում է, որ «Գենշտաբի 1976 թվականի քարտեզով սահմանազատումը Տավուշի հատվածում ադրբեջանական մի քանի գյուղերի համար ստեղծելու է նման կամ ավելի բարդ խնդիրներ, քան ունի Կիրանցը, մինչդեռ Տավուշում չկա մի այլ հայկական գյուղ, որ այդ ընթացքից կարող է տուժել»: Պատճառը այն է, որ սահմանի երկայնքի մոտ 70 տոկոսի հատվածում հենց հայկական կողմն էր 90-ականներին նահանջել։ «Տավուշում 90-ականներից հայկական կողմի վերահսկողությունից դուրս գտնվում է մոտավորապես 90-95 կմ² տարածք, որից մոտավորապես 35 կմ² ադրբեջանական ուղիղ վերահսկողության տակ է, իսկ մոտ 60-ը՝ չեզոք գոտի է: Բացի այդ, չեզոք գոտուն հարող ևս մի քանի տասնյակ քառակուսի կմ տարածքներ այս 30 տարիների ընթացքում չեն մշակվել մասնակի կամ ամբողջովին: Ադրբեջանի օկուպացիայի ներքո պահվում են հայկական գյուղերի տարածքներ։ Խոսքը, օրինակ, Վազաշենի հողերի մասին է՝ 6 կմ², Պառավաքար գյուղի հանդերի և այգիների մասին է՝ 10 կմ²»։
Քաղաքագետը նշեց նաև, որ Աշաղը Ասկիպարա և Բաղանիս Այրում գյուղերը արդեն իսկ կորցրել են տասնյակ տներ՝ նկատի ունենալով, որ սահմանազատման արդյունքում դրանք անցել են ՀՀ-ին։ Բաղանիս Այրում գյուղի պարագայում գյուղի տարածքի մոտ 20 տոկոսը այս սահմանազատման արդյունքում անցնում է Հայաստանին: Նա նշեց, որ եթե ԽՍՀՄ Զինուժի գենշտաբի 1976 թվականի 1 կմ-ոց քարտեզով Ոսկեպարի եկեղեցուց մինչ սահման 100-ից ավելի մետր է, ապա 1990 թվականի 500 մետրանոց քարտեզով՝ մոտ 20 մ է։ 1976 թվականի քարտեզը, որ դրվել է սահմանազատման հիմքում, ըստ քաղաքագետի, հակահայկական չէ, ինչը վկայում են վերոնշյալ փաստերը։
Հարցազրույցն ամբողջությամբ՝ տեսանյութում։
Ռոբերտ Անանյան
