22.04.2026 | 23:30
ՀՀ տարածքում ավտոճանապարհները հիմնականում անցանելի են
Ցնցումներ են սպասվում Իրանի նախագահի մահից հետո․ ռումբը ով էլ պայթեցնի՝ ՀՀ-ն պիտի պատրաստվի․ Հրաչյա Արզումանյան․ ՏԵՍԱՆՅՈՒԹ
Քաղաքականություն
20.05.2024 | 21:00
Իրանի նախագահ Էբրահիմ Ռաիսին, արտգործնախարար Աբդոլահիանը և մի քանի այլ պաշտոնյաներ զոհվել են ուղղաթիռի վթարի հետևանքով: Իրանի պետական հեռուստատեսությունը մայիսի 20-ին հայտնել է, որ ուղղաթիռը կործանվել է եղանակային վատ պայմանների պատճառով:
Մարդիկ սկսեցին քննարկել նաև Իսրայելի միջամտության հավանական տարբերակը՝ հաշվի առնելով, որ վերջին ամիսներին խիստ սրվել են երկու երկրների հարաբերությունները․ Իրանն Իսրայելի վրա ԱԹՍ-ներով հարձակում էր ձեռնարկել՝ ի պատասխան Իսրայելի կողմից իսրայելական հյուպատոսարանի վրա հարձակման։
Ազգային անվտանգության և ռազմական հարցերով փորձագետ, քաղաքագիտության դոկտոր Հրաչյա Արզումանյանին Factor TV-ի հետ զրույցում հարց ուղղեցինք՝ կա՞ն, արդյոք, տարածաշրջանում թեժացումների, ռազմաքաղաքական իրավիճակի սրման նախադրյալներ։ Իրանը նաև դեմ է հանդես եկել Ադրբեջանի և Ռուսաստանի պահանջած «Զանգեզուրի միջանցքին»։ Եվ հաշվի առնելով, որ մեկ-երկու ամիս ժամանակ կա՝ մինչ նոր նախագահի ընտրությունը, որոշակի վակուում չի՞ բացվում, արդյոք, տարածաշրջանում։ Արզումանյանը պնդեց, որ ըստ էության՝ գլխատվել է Իրանի արտաքին քաղաքականությունը, որը վարվել է վերջին տարիներին, ինչը տարածաշրջանային ցնցումների կարող է բերել։
«Իրանը բավականին հաջողակ ռազմավարություն էր իրականացնում, որը հիմնված էր դիվանագիտական աշխատանքի և ուժային գործոնի կիրառման վրա։ Իրանը կարողացել է պատերազմ սկսել Իսրայելի տարածքում։ Իրանը կարողացել է վերականգնել հարաբերությունները Սաուդյան Արաբիայի և Պակիստանի հետ։ Այս ամենը կապված էր ԱԳ նախարարի գործունեության հետ։ Իսլամական հեղափոխության պահապանների կորպուսն ուժային քաղաքականությունն էր ձևավորում, ԱԳՆ-ն՝ դիվանագիտական։ Այս դեպքը գլխատել է այս քաղաքականությունը, Իրանը պարալիզացվել է՝ Աբդոլահիանին փոխարինելը շատ դժվար է լինելու»,- ասաց նա։
Հրաչյա Արզումանյանը կանխատեսում է, որ Իրանի նախագահի, ԱԳ նախարարի մահը ցնցումներ է բերելու Իրանին, և փորձ կարվի երկիրը նաև ապակայունացնել, և ըստ փորձագետի՝ այդ ռումբը ով էլ պայթեցնի, ՀՀ-ն պիտի պատրաստվի անվտանգային ճգնաժամերին։
Հարցազրույցն ամբողջությամբ՝ տեսանյութում։
Ռոբերտ Անանյան
