Ո՞ւմ է պատկանում «Էվրիկա» սուպերմարկետների ցանցը, որտեղ այսօր խուզարկություններ են իրականացվել

Այսօր ՀՀ քննչական կոմիտեն հայտնեց, որ «Էվրիկա» առևտրային կենտրոններում` տարբեր հասցեներով, խուզարկություններ են իրականացվել։

Աշխատանքային օրվա ավարտին Քննչական կոմիտեի խոսնակ Գոռ Աբրահամյանը Factor.am-ին ասաց, որ նախաքննության գաղտնիությունից ելնելով հրապարակման ենթակա տեղեկատվություն չի կարող փոխանցել, թե «Էվրիկա»-ում իրականացված խուզարկություններն ինչ արդյունք են ունեցել։

Ավելի վաղ նա մանրամասնել էր, որ խուզարկություններն իրականացվում են ՔԿ-ի տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթի շրջանակներում։

Նշենք, որ «Էվրիկա» գրուպը պատկանում է Թեմուր Ուսուբովին։ Factor.am-ն իրավաբանական անձանց պետական ռեգիստրից՝ (e-register) տեղեկացավ, որ Թեմուր Ուսուբովն «Էվրիկա» գրուպ ընկերությունում 55 տոկոս մասնակցություն ունի։ Բացի նրանից, ընկերությունում 30 տոկոս մասնակցություն ունի Ռոման Ուսուբովը, մնացած 15 տոկոսը պատկանում է Թամազ Ուսուբովին։

Թեմայի շուրջ պարզաբանումներ ստանալու համար Factor.am-ը փորձեց կապ հաստատել «Էվրիկա» գրուպի տնօրինության հետ․ զանգահարեցինք «Սփյուռ» տեղեկատվական համակարգում առկա ընկերության հեռախոսահամարներով, սակայն, մեր զանգերն անպատասխան մնացին։

ՊԵԿ-ն այսօր հաղորդագրություն էր տարածել՝ տեղեկացնելով, որ միայն ապրիլին «Էվրիկա» սուպերմարկետների ցանցը ՀԴՄ կիրառման կանոնների խախտում թույլ տալու համար տուգանվել է 20 մլն դրամով:

Մանյա Պողոսյան