Խնդրել է փրկել, վիրավորներին օգնել, ռուսները երեսին ծիծաղել են. վկայություններ Արցախից. ՏԵՍԱՆՅՈՒԹ

6-ամյա Սեյրանը սեփական աչքերով է տեսել՝ ինչպես են եղբայրները արնաքամ լինում, մինչև այսօր դետալ առ դետալ հիշում է կատարվածը։

Ղազարյանների չորս որդիներից 2-ը՝ 10-ամյա Միքայելն ու 8-ամյա Նվերը զոհվել են 2023-ի սեպտեմբերի 19-ին՝ Ասկերանի շրջանի Սառնաղբյուր գյուղում, Ադրբեջանի ԶՈՒ լայնածավալ հարձակման հետևանքով։

Սեյրանը փրկվել է իր իսկ հնարամտության և բժիշկների արագ աշխատանքի շնորհիվ, սակայն վիրավորման հետևանքով առաջացած առողջական խնդիրները մինչև վերջ լուծված չեն։ 1-ամյա Կարենին անվտանգ ծնողներին են հասցրել հարևանները։

Երեխաների ծնողները՝ Զարինե և Ռադիկ Ղազարյանները, Factor TV-ի հետ զրույցում պատմում են, որ տարածքը, որտեղ երեխաները եղել են, հայկական դիրքերից մոտ 600 մետր, իսկ ռուս խաղաղապահների անցակետից մոտ 3 կմ հեռավորության վրա է։

Համագյուղացիներից ոմանք փորձել են մոտենալ ու օգնություն ցույց տալ, սակայն ադրբեջանական Զինված ուժերը նրանց ևս թիրախավորել են ու վիրավորել։

Զարինեի խոսքով, երբ Սառնաղբյուրի գյուղապետը տեղեկացրել է ռուս խաղաղապահներին, որ գյուղում զոհեր ու վիրավորներ կան, որոնց օգնել է պետք, նրանք ի պատասխան ծիծաղել են։

Ըստ Ռադիկ Ղազարյանի, գյուղի ուղղությամբ Ադրբեջանի Զինված ուժերը կիրառել են տարբեր զինատեսակներ՝ 120 միլիմետրանոց ականանետեր, «Գրադ» համազարկային կրակի ռեակտիվ համակարգեր։

Ծնողները երեխաների դիերը տեսել են Ստեփանակերտում, սեպտեմբերի 27-ին դիերն ուղարկվել են Հայաստան։

Զարինեն ու Ռադիկը 2 որդիների հետ այժմ ապրում են Լոռու մարզի Մեծավան գյուղում, որ 200 կմ հեռավորության վրա է Մասիս քաղաքից, որտեղ հուղարկավորված են երեխաները։