Սահմանազատման և սահմանային անվտանգության հարցերով հանձնաժողովին կից աշխատանքային խմբի աշխատանքները շարունակվում են. փոխվարչապետի գրասենյակ

Մայիսի 15-ին լրանում է Տավուշի մարզում սահմանազատված հատվածների վերաբերյալ արձանագրության ստորագրման նախանշված ժամկետը։ Արդյո՞ք Հայաստանի և Ադրբեջանի սահմանազատման հանձնաժողովներն այսօր կստորագրեն արդեն իսկ սահմանազատված հատվածների արձանագրություն-նկարագրությունը, թե՝ ոչ, այս պահի դրությամբ ոչինչ հայտնի չէ։

Վարչապետ Նիկոլ Փաշինյանը մայիսի 7-ի ասուլիսում հայտարարել էր, որ Տավուշի հատվածում սահմանազատման «90 տոկոսը արված» է` շեշտելով՝ Կիրանցի հատվածում կա սահմանազատման ենթակա 3 կետ, որոնց շուրջ դեռ պետք է լուծումներ գտնեն։

Դեռ անցյալ շաբաթ Կիրանցի վարչական ղեկավար Կամո Շահինյանը Factor.am-ին տեղեկացրել էր, որ վիճահարույց երեք կետերի՝ գյուղի կամրջի, դպրոցի և մի քանի տների հատվածում սահմանազատումը ժամանակավորապես դադարեցվել է։ Ինչու է Կիրանցի երեք կետերում սահմանազատումը սառեցվել և երբ կվերսկսվեն աշխատանքները, այս հարցով Factor.am-ը գրավոր հարցում էր ուղարկել Մհեր Գրիգորյանի գրասենյակ։

Մեր գրավոր հարցմանն ի պատասխան` Գրիգորյանի գրասենյակից հայտնել են, որ սահմանազատման և սահմանային անվտանգության հարցերով հանձնաժողովին կից աշխատանքային խմբի աշխատանքները շարունակվում են: Միևնույն ժամանակ նաև նշել են,  որ սահմանազատման գործընթացի վերաբերյալ Կառավարության պաշտոնական կայքէջում պարբերաբար հրապարակվում է ընթացքի մասին տեղեկատվություն:

Նշենք, որ Կառավարության վերջին հաղորդագրության համաձայն՝ Հայաստանի և Ադրբեջանի սահմանին գեոդեզիական չափումների հիման վրա՝ կոորդինատների ճշգրտման աշխատանքների շրջանակներում, մայիսի 6-ի դրությամբ տեղադրվել է թվով 40 սահմանային սյուն։ Իսկ երկու երկրների փորձագիտական խմբերի աշխատանքները շարունակվում են:

Մանյա Պողոսյան