Այսօր լրանում է սահմանազատված հատվածների վերաբերյալ արձանագրության ստորագրման վերջնաժամկետը

Մայիսի 15-ին լրանում է Տավուշի մարզում սահմանազատված հատվածների վերաբերյալ արձանագրության ստորագրման նախանշված ժամկետը։ Ապրիլի 19-ին Հայաստանի և Ադրբեջանի միջև պետական ​​սահմանի սահմանազատման հարցերով պետական ​​հանձնաժողովների ութերորդ հանդիպման արդյունքների վերաբերյալ ԱԳՆ-ի տարածած հաղորդագրության մեջ, մասնավորապես, ասված էր․ «Որոշել են, որ սահմանագծի տվյալ հատվածների նկարագրությունը կազմվելու է հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը կձևակերպվի համապատասխան Արձանագրություն-նկարագրությամբ, ինչը պետք է համաձայնեցվի ու ստորագրվի Կողմերի միջև մինչև 2024 թ. մայիսի 15-ը»:

Արդյո՞ք Հայաստանի և Ադրբեջանի սահմանազատման հանձնաժողովներն այսօր կստորագրեն արդեն իսկ սահմանազատված հատվածների արձանագրություն-նկարագրությունը, թե՝ ոչ, այս պահի դրությամբ ոչինչ հայտնի չէ։

Սահմանազատման հայկական հանձնաժողովի ղեկավար, փոխվարչապետ Մհեր Գրիգորյանի գրասենյակից Factor.am-ին չհաջողվեց մեկնաբանություն ստանալ, մեր զանգերին չեն արձանաքում նաև վարչապետի աշխատակազմից և Անվտանգության խորհրդից։

Վարչապետ Նիկոլ Փաշինյանը մայիսի 7-ի ասուլիսում հայտարարել էր, որ Տավուշի հատվածում սահմանազատման «90 տոկոսը արված» է, շեշտելով՝ Կիրանցի հատվածում կա սահմանազատման ենթակա 3 կետ, որոնց շուրջ դեռ պետք է լուծումներ գտնեն։

Դեռ անցյալ շաբաթ Կիրանցի վարչական ղեկավար Կամո Շահինյանը Factor.am-ին տեղեկացրել էր, որ վիճահարույց երեք կետերի՝ գյուղի կամուրջի, դպրոցի և մի քանի տների հատվածում սահմանազատումը ժամանակավորապես դադարեցվել է։

Ինչու է Կիրանցի երեք կետերում սահմանազատումը սառեցվել և երբ կվերսկսվեն աշխատանքները, այս հարցով Factor.am-ը գրավոր հարցում էր ուղարկել Մհեր Գրիգորյանի գրասենյակ, պատասխան, սակայն, դեռ չենք ստացել։

Այսօր Կիրանցի վարչական ղեկավարը մեզ հետ զրույցում ասաց, որ նույն վիճակն է, խոցելի հատվածներում սահմանազատման աշխատանքներ չեն կատարվում և տեղյակ էլ չեն, թե երբ տեղի կունենան։

Նշենք, որ Կառավարության վերջին հաղորդագրության համաձայն՝ Հայաստանի և Ադրբեջանի սահմանին գեոդեզիական չափումների հիման վրա՝ կոորդինատների ճշգրտման աշխատանքների շրջանակներում, մայիսի 6-ի դրությամբ տեղադրվել է թվով 40 սահմանային սյուն։ Իսկ երկու երկրների փորձագիտական խմբերի աշխատանքները շարունակվում են:

Մանյա Պողոսյան