Հոգևորականները ՀՀ քաղաքացի են, հակադրվում են հակաիրավական գործողությանը․ չի խախտվում Սահմանադրությունը․ Պարույր Հայրիկյան․ ՏԵՍԱՆՅՈՒԹ

Ո՞րն է սահմանը, ե՞րբ Հայ առաքելական եկեղեցին և բարձրաստիճան հոգևորականները կարող են միջամտել ներքաղաքական գործերին, առաջնորդել ընդդիմադիր բողոքի ակցիաներ, պահանջել վարչապետի հրաժարական։ ՀՀ կառավարող ուժից ասում են՝ նրանք Սահմանադրությունն են խախտում՝ խառնվելով պետության գործերին։ Եվ երկրորդ փաստարկը, որ բերվում է այն է, որ եկեղեցականները չեն կրում պատասխանատվություն քաղաքական որոշումների հետևանքների համար, բայց ընդդիմության հետ միասին՝ փորձում են հարկադրել օրինակ՝ կասեցնել սահմանազատումը։ Իշխանությունն ասում է՝ եթե կասեցնենք այդ գործընթացը, Ադրբեջանը հարձակվի, դուք պատասխանատո՞ւ եք հետևանքի համար։

ԱԻՄ առաջնորդ Պարույր Հայրիկյանը Factor TV-ի հետ զրույցում, պատասխանելով այս հարցադրմանը, նշեց, որ պատմության ընթացքում եղել են ժամանակներ, երբ հոգևորականները վերցրել են շարժումների առաջնորդություն․

«Սահմանն այն է, երբ մարդկայինն ու բարոյականը նահաջում է, տեղի է տալիս, և այդտեղ հոգևորի ներկայացուցիչը իրեն դրսևորում է։ Հայաստանի հոգևորականները ՀՀ քաղաքացի են որպես անհատ, և պետությունը, քաղաքացիներին միավորող, նրանց իրավունքներն ու պարտականությունները համակարգող կառույց է։ Այնպես որ, խոսել այն մասին, որ ՀՀ քաղաքացի հոգևորականը չպետք է մասնակցի ազգային գործընթացներին, սխալ է։ Չէ՞ որ սա քաղաքական գործընթաց չէ միայն։ Սա ազգային, բարոյական, արժեհամակարգային գործողություն է, որոնք հակադրվում են հակաիրավական գործողություններին»,- ասաց ԱԻՄ առաջնորդը։

Նա նշեց, որ ինքը աջակցում է Բագրատ Արքեպիսկոպոս Գալստանյանի առաջնորդած ընդդիմադիր շարժմանը, սակայն նրան կուռք չի դարձնում։

Հարցազրույցն ամբողջությամբ՝ տեսանյութում։

Ռոբերտ Անանյան