Վրաստանում ուսանողները դասադուլ են իրականացնում. ՏԵՍԱՆՅՈՒԹ

Վրաստանի Թբիլիսի, Բաթումի և Քութայիսի քաղաքներում բողոքի ակցիաներ են անցկացնում ուսանողները, ովքեր դասադուլ են հայտարարել՝ պահանջելով չեղարկել «օտարերկրյա գործակալների» մասին օրինագիծը, գրում է News Georgia-ն։

Բաթումիում փողոց են դուրս եկել Շոթա Ռուսթավելիի անվան պետական ​​համալսարանի և ծովային ակադեմիայի ուսանողները։ Դասադուլին միացել է մինչև 600 ուսանող և 35 ուսուցիչ։

Մայրաքաղաքի տարբեր բուհերի հարյուրավոր ուսանողներ հավաքվել են Ճավճավաձեի պողոտայում գտնվող Թբիլիսիի պետական ​​համալսարանի մոտ։ Նրանք երթ են սկսել դեպի Վրաստանի խորհրդարան։

Քութայիսիում դասադուլ են անում Ակակի Ծերեթելիի անվան պետական ​​համալսարանի և Քութայիսիի միջազգային համալսարանի ուսանողները։ Վերջինը հիմնադրել է իշխող «Վրացական երազանք» կուսակցության պատվավոր նախագահ, միլիարդատեր Բիձինա Իվանիշվիլին։

Ուսանողները նշել են, որ մտադիր չեն լսարաններ վերադառնալ, քանի դեռ իրենց պահանջները չեն կատարվել։ Նրանք իրենց բուհերի ղեկավարությանը կոչ են անում արձանագրել իրենց դիրքորոշումը Վրաստանի իշխանությունների գործողությունների վերաբերյալ։

Վրաստանում ներկայում գործում է 62 համալսարան՝ 43 մասնավոր, 19 պետական: Առայժմ միայն «Վրաստանի Համալսարանն» է որոշել ամբողջությամբ դադարեցնել ուսումնական գործընթացը երկրում տեղի ունեցող իրադարձությունների պատճառով։ Համալսարանում արձակուրդներ են հայտարարվել մինչև մայիսի 20-ը։

Մանրամասները՝ տեսանյութում։