Մտածված պատերա՛զմ են հրահրում՝ պահանջելով կասեցնել սահմանազատումը․ խարխլում են ՀՀ ինքնիշխանությունը․ Վաղարշակ Հակոբյան․ ՏԵՍԱՆՅՈՒԹ

Բագրատ արքեպիսկոպոս Գալստանյանն արձագանքել է վարչապետ Նիկոլ Փաշինյանի այս մեղադրանքին․ «Ով ասում է՝ կասեցում, նրանց քաղաքական օրակարգն է՝ սադրել պատերազմ, ապահովել պատերազմի արդյունքում իշխանափոխություն ՀՀ-ում, հաստատել մարիոնետային ոչ լեգիտիմ իշխանություն, լուծարել ՀՀ պետականությունը»։

Տավուշի թեմի առաջնորդի առաջին արձագանքը սկսվում էր «ամոթ» բառով․ «Պատերազմը, երևի, ինքն արդեն պայմանավորվել է։ Այս երթն ինքնամաքրվելու, ինքնաճանաչողության մասին է։ Ինչո՞ւ են վախենում այդ մարդիկ։ Պատերազմի մունետիկն ինչպե՞ս կարող է պատերազմ հրահրելու մեջ մարդկանց մեղադրել, ինչպե՞ս։ Իր գործը չի՝ մեր պահանջն ինչ է»։

ԱԺ «Քաղաքացիական պայմանագիր» խմբակցության պատգամավոր Վաղարշակ Հակոբյանին Factor TV-ի տաղավարում հարց ուղղեցինք՝ այս իշխանության օրոք են պատերազմներ եղել, ի՞նչ փաստերով են իրենք մեղադրում ցուցարարներին պատերազմ բերելու մեջ։

«Ձեզ մի հարց տամ, ի՞նչ են ուզում այդ մարդիկ։ Նախ՝ իրենք նշել են, որ այս պահին իշխանափոխության նպատակ չունեն, չեն պահանջում վարչապետի հրաժարական։ Այո, իրենք նշել են, որտեղ զինվորը կարող է կանգնել, դա էլ սահմանը պիտի լինի։ Պատկերացրեք իրավիճակ, երբ ադրբեջանցիները, որ մեր սահմաններին են գտնվում Ջերմուկի և այլ հատվածներում, չհեռանան այդ հատվածներից։ Եթե որևէ մի բանական մարդ դեմ է սահմանազատմանը, նա մտածված ձևով ՀՀ-ին տանում է փորձանքի, հրահրում է պատերազմ»,- նշեց ՀՀ իշխող ուժի ներկայացուցիչը։

Պատգամավորը պնդեց նաև, որ Բագրատ արքեպիսկոպոս Գալստանյանի առաջնորդած քաղաքական շարժման շահառուն Ռոբերտ Քոչարյանն է, որն իշխանափոխության օրակարգ ունի։

Հակոբյանը խոսեց նաև մայիսի 9-ին Երևանում այս ուժերի հրավիրած հանրահավաքի և դրա նպատակների, հավանական բախումների, Ռուսաստանում գտնվող Արշակ Կարապետյանի և այլ գործիչների՝ հեռավար հակաիշխանական պայքար հայտարարելու փաստի, և ներքաղաքական կյանքին առնչվող այլ հարցերի մասին։

Հարցազրույցն ամբողջությամբ՝ տեսանյութում։

Ռոբերտ Անանյան