15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Գարեգին 2-րդ կաթողիկոսը մայիսի 9-ին կմիանա՞ Տավուշից եկած երթի մասնակիցներին․ Մայր Աթոռի արձագանքը
Քաղաքականություն
07.05.2024 | 18:52
Տավուշի թեմի առաջնորդ Բագրատ արքեպիսկոպոս Գալստանյանի առաջնորդած «Տավուշը հանուն հայրենիքի» շարժման երթը մայիսի 9-ին կհասնի Երևան։
Factor.am-ը Մայր Աթոռի տեղեկատվական համակարգի տնօրեն Տեր Եսայի քահանա Արթենյանից հետաքրքրվեց՝ Ամենայն Հայոց Կաթողիկոսը մայիսի 9-ին կլինի՞ Հանրապետության հրապարակում, թե՞ ոչ։
«Չեմ մեկնաբանում, եթե լինի, հայտարարություն կլինի»,- կարճ արձագանքեց Մայր Աթոռի տեղեկատվական համակարգի տնօրենը։
Հիշեցնենք, որ Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ էին անում՝ փակելով Հայաստան-Վրաստան միջպետական ճանապարհի տարբեր հատվածներ՝ դեմ արտահայտվելով սահմանազատման հարցով իշխանության որդեգրած քաղաքականությանը։
Նշենք, որ սահմանազատման դեմ պայքարողները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից քայլերթով գալիս են Երևան, ինչպես իրենք են ասում՝ միակողմանի սահմանազատման գործընթացը կասեցնելու նպատակով։ Նրանք նախատեսում են մայրաքաղաք հասնել մայիսի 9-ին։
Ավելի վաղ Բագրատ սրբազանը հայտարարել էր, որ Մայր Աթոռն ու Ամենայն Հայոց Կաթողիկոս Գարեգին Երկրորդը կանգնած են իր գլխավորած շարժման կողքին։
«Մայր Աթոռը միացած է մեզ միշտ։ Առանց Վեհափառ հայրապետի օրհնության մենք չենք գործում։ Հայոց հայրապետն ինքն է մեր հայրը, մեզ օրհնողը, մեզ առաջնորդողը»,- շեշտել էր նա։
Վարչապետ Նիկոլ Փաշինյանն էլ այսօր հրավիրված մամուլի ասուլիսի ժամանակ անդրադառնալով շարժմանը՝ ասել էր, որ գործընթացի առաջնորդը Ամենայն Հայոց Կաթողիկոսն է, իսկ թիվ մեկ շահառուն՝ «Հայաստան» դաշինքի ղեկավար Ռոբերտ Քոչարյանը։
Մանյա Պողոսյան
