Հասարակություն
03.05.2024 | 18:33
Դատավորներն այսօր ընդհանուր ժողովում ԲԴԽ անդամ են ընտրել Վերաքննիչ քրեական դատարանի դատավոր Արմեն Դանիելյանին։ Քվեարկությանը մասնակցել է 253 դատավոր, նրանցից 132-ը Դանիելյանին կողմ է քվեարկել։
Հիշեցնենք, որ Բարձրագույն դատական խորհրդի դատավոր անդամի տեղը թափուր էր, քանի որ ԲԴԽ անդամ, դատավոր Արշակ Վարդանյանը փետրվարի 27-ին հրաժարականի դիմում էր ներկայացրել։
Խորհրդի անդամի ընտրությունը պետք է տեղի ունենար մարտի 29-ին նշանակված Դատավորների ընդհանուր ժողովի ընթացքում, սակայն ժողովից 1 օր առաջ միակ թեկնածուն՝ Վազգեն Ռշտունին հայտարարություն էր տարածել՝ հայտնելով, որ չի հավակնում ԲԴԽ անդամ դառնալ։ Առանց հստակ պատճառներ նշելու Ռշտունին ասել էր, որ վերջին օրերին տեղի են ունեցել իրադարձություներ, որոնցով պայմանավորված է կայացրել որոշումը: «Ինձ համար մեծագույն պատիվ կլիներ դատավորներին տվյալ մարմնում ներկայացնելը, սակայն նժարին դրված էին իմ անձի հետ առնչություն չունեցող հարցեր, որոնք, իմ գնահատմամբ, ավելի կարեվոր են, քան Բարձրագույն դատական խորհրդի անդամ դառնալը. հակառակ մոտեցումը կարող էր գնահատվել եսասիրական»,- հայտարարության մեջ նշել էր Վազգեն Ռշտունին՝ հայցելով դատավորների ներողամտությունը, որոնք իր՝ Բարձրագույն դատական խորհրդի անդամ դառնալու հետ կապված դրական սպասումներ են ունեցել։
Արաքս Մամուլյան
