11.01.2025 | 22:52
Վարչապետը առաջնահերթ է համարում խաղաղության գործընթացը, թվայնացումը և կոռուպցիայի դեմ պայքարը. ՏԵՍԱՆՅՈՒԹ
Թբիլիսիում անհայտ անձինք հարձակվել են ցուցարարների վրա
Քաղաքականություն
03.05.2024 | 16:27
Մի խումբ անհայտ անձինք հարձակվել են Թբիլիսիում «օտարերկրյա գործակալների» մասին օրինագծի դեմ բողոքի ցույցերի մասնակիցների վրա։ Վրացական լրատվամիջոցների փոխանցմամբ՝ Վրաստանի մայրաքաղաքի Հերոսների հրապարակում հարձակումը տեղի է ունեցել մայիսի 2-ի լույս 3-ի գիշերը, և տևել է մոտ 10 րոպե՝ մինչև մարդիկ սկսել են հավաքվել դեպքի վայրում։ Ըստ Pirveli հեռուստաալիքի՝ հարձակվողները շուրջ 20-ն են եղել։
«Գրուզիա օնլայնի» փոխանցմամբ էլ՝ հարձակմանը մասնակցել է մինչև 15 մարդ՝ «ուժեղ կազմվածքով երիտասարդներ», որոնք մի քանի մեքենաներով հասել են հանրահավաքի վայր:
Ըստ ականատեսների՝ նրանք բախվել են հեծանվով մի տղամարդու, և իջնելով մեքենաներից՝ հարձակվել են ևս մի քանի ցուցարարների վրա։ Հաղորդվում է առնվազն հինգ տուժածի մասին, նշվում է, որ կոտրվել են մի քանիսի գլուխները, մեկի՝ ատամը, բժիշկները տեղում օգնություն են ցուցաբերել նրանց։ Հարձակվողները կարողացել են հեռանալ դեպքի վայրից։
Մայիսի 2-ի երեկոյան «Օտարերկրյա ազդեցության թափանցիկության» մասին օրինագծի դեմ բողոքի ակցիայի մասնակիցները հայտարարել են իրենց պահանջների մասին։ Դրանցից առաջինը բոլոր «ապօրինի և անարդարացիորեն կալանավորվածների» ազատ արձակումն է։
Երկրորդը և «ամենակարևորը»՝ «օտարերկրյա գործակալների մասին» օրինագիծը հետ կանչելը, հակառակ դեպքում, ցուցարարները մտադիր են «լիարժեք անհնազանդություն» հայտարարել։ Երրորդ պահանջն այն է, որ բոլոր նրանք, ովքեր բռնության են դիմել կանանց, երեխաների և այլ ցուցարարների նկատմամբ, «առավելագույն պատիժ կրեն»։
