ԵՄ-ն Բաքվին լրացուցիչ 2 մլն եվրո կհատկացնի ականազերծման համար

Եվրամիությունը նախատեսում է Ադրբեջանին լրացուցիչ 2 մլն եվրո հատկացնել ականազերծման համար։ Այս մասին Բաքվում «Ադրբեջանում ականազերծան եվրոպական խմբի նախաձեռնության» միջոցառման ժամանակ հայտարարել է Եվրոպական հանձնաժողովի Հարևանության և ընդլայնման բանակցությունների գլխավոր տնօրեն Խերտ Յան Կոպմանը։

«Այսօր ես շատ ուրախ եմ հայտարարելու այս տարի հատկացվելիք լրացուցիչ 2 միլիոն եվրո դրամաշնորհային ֆինանսավորման մասին՝ լրացուցիչ տեխնիկական աջակցություն տրամադրելու ականազերծման գործողությունների կարողությունների հետագա ամրապնդման համար»,- ասել է նա։

Պաշտոնյան նշել է, որ Եվրամիությունն ու ԵՄ անդամ երկրներն Ադրբեջանում ականազերծման ոլորտում ամենամեծ միջազգային դոնորն են, որոնք 2020 թվականից ի վեր տրամադրել են շուրջ 10 միլիոն եվրո դրամաշնորհային օգնություն՝ հաջակցություն Ադրբեջանում մարդասիրական ականազերծման: Հաշվի առնելով հատկացված լրացուցիչ միջոցները՝ ակնկալվում է, որ այս գումարը կավելանա՝ հասնելով գրեթե 13 միլիոն եվրոյի։

Հրապարակվել է նաև ԵՄ երկրների փոխանցումների ցանկը։ Մասնավորապես, Իտալիան ԿԽՄԿ-ին որպես օպերատիվ նվիրատվություն տրամադրել է 500,000 եվրո, Գերմանիան՝ 560,000 եվրո՝ նպաստելու Հարավային Կովկասում ականների արգելման նախագծին և Օտտավայի կոնվենցիային միանալուն, Ֆրանսիան՝ 500,000 եվրո տրամադրել է ANAMA-ին (Ադրբեջանի ականազերծման գործակալություն)՝ մետաղորսիչների և 310 ականազերծող սարքերի համար, Սլովենիան՝ 50,000 եվրո՝ որպես ANAMA-ի հետ 2022 թվականի ապրիլին ստորագրված համագործակցության համաձայնագրի մաս, Էստոնիան՝ 50,000 եվրո՝ ԿԽՄԿ ականազերծման գործողություններին աջակցելու համար, Հունգարիան՝ 25,000 եվրո օպերատիվ նվիրատվություն է տրամադրել ANAMA-ին, Բելգիան՝ 250,000 եվրո՝ APOPO-ի ականազերծման գործողություններին աջակցելու համար, իսկ Խորվաթիան Ադրբեջանին ական հայտնաբերող շներ է տրամադրել։

Հաղորդվում է, որ նախատեսված լրացուցիչ փոխանցումները ԵՄ անդամ երկրներից՝ ընդհանուր մոտ 2,75 մլն եվրոյի չափով, տրամադրելու են Իտալիան, Գերմանիան, Ֆրանսիան, Խորվաթիան, Նիդերլանդները և Լիտվան։

Էմմա Չոբանյան