07.10.2026 | 09:30
ՀՀ տարածքում ավտոճանապարհներն անցանելի են
Վրաստանի խորհրդարանի մոտ անցկացված բողոքի ակցիայի ժամանակ 15 մարդ է հոսպիտալացվել
Քաղաքականություն
02.05.2024 | 15:18
Մայիսի 1-2-ը Թբիլիսիում Վրաստանի խորհրդարանի մոտ «օտարերկրյա գործակալների» մասին օրինագծի դեմ բողոքի ակցիայի ժամանակ 15 մարդ է հոսպիտալացվել։ Այս մասին հայտնում է երկրի Առողջապահության նախարարությունը, փոխանցում է News Georgian:
Տուժածների թվում ոստիկաններ կան։ Որոշ հիվանդներ արդեն դուրս են գրվել կլինիկաներից։
Ավելի վաղ Առողջապահության նախարարությունը հայտնել էր, որ տուժած ցուցարարները դեմքի, գլխի և մարմնի տարբեր մասերի վնասվածքներ ունեն, ինչպես նաև թունավորում և շնչուղիների հետ կապված բարդություններ։
Ըստ TV Pirveli-ի՝ առնվազն մեկ մարդ հոսպիտալացվել է ռետինե փամփուշտներից վնասվածքներով։ Ներքին գործերի նախարարությունը պնդում է, որ ոստիկանությունը դրանք չի կիրառել։ Օգտագործվել են միայն ջրցան մեքենաներ և արցունքաբեր գազ, պնդում են իրավապահները։
Տասնյակ հազարավոր մարդիկ մայիսի 1-ի երեկոյան հավաքվել են Վրաստանի խորհրդարանի դիմաց՝ պահանջելով հետ կանչել «օտարերկրյա գործակալների» մասին օրինագիծը։
Ապրիլի 9-ի և Չիչինաձեի փողոցներից խորհրդարանի ծառայողական մուտքերի մոտ ցույցը վերաճել է ոստիկանության հետ բախումների։ Շենքի բակում տեղակայված հատուկ ջոկատայինները հատուկ տեխնիկա են կիրառել։ Ոստիկանների ուղղությամբ քարեր, շշեր ու ճայթուկներ են նետվել։ Խորհրդարանի մոտ բողոքի ցույցն ավարտվել է լուսադեմին։
