Այրվածքաբանականում օրերով ջուր չի լինում, «Վեոլիա ջուր»-ը նշում է՝ իրենց կողմից խնդիր չկա

«Այրվածքաբանության և մաշկաբանության ազգային կենտրոն»-ում վերջին 15 օրվա ընթացքում պարբերաբար ջրանջատումներ են լինում, որը խոչընդոտում է հաստատության բնականոն աշխատանքը։ Կենտրոնի տնօրեն Հովհաննես Հովհաննիսյանը Factor.am-ին փոխանցեց, որ «Վեոլիա Ջուր» ընկերության հետ քննարկում են պարբերաբար ջրանջատումներին վերջնական լուծում տալու հարցը, սակայն գործընթացն արդեն երկար ժամանակ է հանգուցալուծում չի ստանում։

«Միացումների հետ կապված խնդիրներ են, հիմա իրենք փորձում են այդ ամեն ինչը շտկել։ Հիվանդանոցում ջուր եղել Է, որովհետև մենք այլ մատակարարման համակարգեր էլ ենք ստեղծել, որ ջուր լինի։ Բայց բնական է՝ այս վիճակը լրացուցիչ դժվարություններ է ստեղծում, որովհետև մի բան է սովորական ջրագիծ ունենաս, մեկ այլ բան լրացուցիչ քայլեր անես»- ասաց կենտրոնի տնօրենը։
Հովհաննիսյանի խոսքով՝ եղել են դեպքեր, որ հիվանդանոցը 4 օր ջուր չի ունեցել և ստիպված են եղել օգտագործել պահուստավորված ջուր։ Ասում է՝ չի կարելի թույլ տալ, որ հիվանդանոցի սանիտարական վիճակը և բուժառուները տուժեն։

«Քանի որ նախկինում միշտ ունեցել ենք խնդիր ջրի հետ, նոր ջրագիծ քաշեցինք հիվանդանոցի համար, որպեսզի բոլոր կանոններին ու պահանջներին համապատասխանեն։ Վերջին 15 օրը ջրանջատումներն ավելի ինտենսիվ են լինում, եթե առաջ գիշերվա ժամերին էր, որը շատ չէր խանգարում, գիշերը մեկին, երկուսին էին անջատում, սովորաբար ջրի կարիք չէր էլ լինում, բայց հետո սկսեցին ավելի շատ»,- ասաց Հովհաննիսյանը։

«Այրվածքաբանության և մաշկաբանության ազգային կենտրոն»-ի տնօրենի խոսքով՝ «Վեոլիա Ջուր» ընկերությունից իրենց պարզաբանում են, որ միացումներն են սխալ տրված և փորձում են շինարարի հետ միասին խնդիրը շտկել։

«Վեոլիա ջուր» ընկերության հասարակայնության հետ կապերի բաժնի աշխատակից Կարինե Կարապետյանը մեզ փոխանցեց, որ բժշկական կենտրոնը ներքին ցանցի խնդիր ունի, որի մասին ընկերությունը բազմիցս տեղեկացրել է։

«Հիվանդանոցի սպասարկման տարածքում է խնդիրը, որով «Վեոլիա ջուր»-ը չի զբաղվում, դա հաստատության տիրույթում է։ Մենք մի քանի անգամ ասել ենք, որ իրենք պետք է պոմպ տեղադրեն, մեր կողմից կարգավորումներն արված են, ոչ մի խնդիր չկա», – ասաց Կարապետյանը։

Անի Թամրազյան