Վրաստանի խորհրդարանում «օտարերկրյա գործակալների» մասին օրինագծի քննարկումը զանգվածային ծեծկռտուք է հրահրել

Վրաստանի խորհրդարանում լիագումար նիստի մեկնարկից առաջ, որի ընթացքում պետք է քննարկվեր «օտարերկրյա գործակալների» մասին օրինագիծը, ծեծկռտուք է սկսվել ընդդիմության և իշխող մեծամասնության ներկայացուցիչների միջև, հայտնում է News Georgia-ն։

«Վրաստանի խորհրդարանում «օտարերկրյա գործակալների» մասին օրինագծի քննարկումը խափանվել է. դահլիճում բախումներ են տեղի ունենում իշխող կուսակցության և ընդդիմության պատգամավորների միջև»,- ասվում է հրապարակման մեջ։

Միջադեպը սկսվել է ընդդիմության կողմից իշխանությունների հասցեին հնչեցրած մեղադրանքներով՝ կապված հատուկ ջոկատայինների գործողությունների հետ, ինչի պատճառով վիրավորվել է ընդդիմադիր «Միացյալ ազգային շարժում» կուսակցության ղեկավար Լևան Խաբեիշվիլին։

Մեղադրանքները դժգոհություն են առաջացրել իշխող «Վրացական երազանքի» ներկայացուցիչների մոտ։ Խորհրդարանականների միջև բանավոր վիճաբանությունը վերաճել է ծեծկռտուքի։

Ապրիլի 30-ի կեսօրին վրացի պատգամավորները երկրորդ ընթերցմամբ սկսեցին քննարկել «օտարերկրյա գործակալների» մասին օրենքը։ Օրենսդիրները մտադիր են հոդված առ հոդված քննարկել փաստաթուղթը։

Նախօրեին Վրաստանի խորհրդարանի իրավական հարցերի հանձնաժողովը հաստատել է «օտարերկրյա գործակալների» մասին օրինագիծը երկրորդ ընթերցմամբ լիագումար նիստում քննարկման ուղարկելը։ Փաստաթղթի քննարկումը տևել է մոտ 10 ժամ և ուղեկցվել է իշխանությունների և ընդդիմության ներկայացուցիչների լեզվակռվով։

Մանրամասները՝ տեսանյութում։