ԱԱԾ-ում բարձրագույն կոչում ունեցողները համազգեստ չեն կրի․ նախագիծ

Ազգային անվտանգության ծառայությունն իրավական ակտերի նախագծերի հրապարակման միասնական կայքում շրջանառության մեջ է դրել կառավարության որոշման նախագիծ, որով առաջարկում է «Ազգային անվտանգության մարմինների զինծառայողների միասնական համազգեստը և տարբերանշանները հաստատելու մասին» N 1217-Լ որոշումից հանել ԱԱԾ զինծառայողների բարձրագույն խմբի պաշտոններին վերաբերող դրույթը:

Նախագծում առաջարկվում է «Ազգային անվտանգության մարմինների զինծառայողների միասնական համազգեստը և տարբերանշանները հաստատելու մասին» N 1217-Լ որոշման 1-ին հավելվածի 1-ին կետից «բարձրագույն,» բառը և կետադրական նշանը։

Այդ որոշումը վերաբերում է նաև ԱԱԾ զինծառայողների համազգեստ կրելու կարգին։
Օրենքի համաձայն՝ Ազգային անվտանգության մարմինների բարձրագույն, գլխավոր, ավագ, միջին և կրտսեր խմբերի պաշտոններ զբաղեցնող զինծառայողները համազգեստը կրում են ըստ շնորհված կոչումների:

Հետևաբար, ստացվում է, որ նախագծով առաջարկվում է, որպեսզի համազգեստ չկրեն միայն բարձրագույն կոչում ունեցողները։ Օրենսդրական այս փոփոխության պատճառն այն է, որ ԱԱԾ տնօրենի պաշտոնը այլևս դադարել է զինվորական լինել, այն արդեն հանրային ծառայության պաշտոն է։

Մասնավորապես, 2023 թվականի դեկտեմբերի 22-ին ընդունվել են «Ազգա­յին անվտանգության մարմիններում ծառայության մասին» օրենքում փոփո­խու­թյուններ կատա­րելու մասին» ՀՕ-1-Ն և «Ազգային անվտան­գու­թյան մարմինների մասին» օրենքում փոփո­խու­թյուն կատարելու մասին» ՀՕ-2-Ն օրենքները, որոնց համաձայն՝ Ազգային անվտանգության ծառայության տնօրենի և տնօրենի տեղակալների պաշտոններն այլևս զինվորական ծառայության պաշտոններ չեն հանդի­սա­նում, ինչպես նաև ուժը կորցրած են ճանաչվել բարձրագույն խմբի պաշտոններին վերաբերող դրույթները։

Ծառայության տնօրենին պաշտոնին նշանակելու և պաշտոնից ազատելու է վարչապետը, տնօրենի տեղակալներին պաշտոնին նշանակելու է և ազատելու է վարչապետը` ծառայության տնօրենի առաջարկությամբ:

Մանյա Պողոսյան