16.02.2026 | 16:06
Հունվարին Ադրբեջանից Հայաստան է արտահանվել 2,4 միլիոն դոլարի արտադրանք
Սահմանազատման վերաբերյալ ընդդիմության հայտարարության նախագիծը ԱԺ օրակարգ չմտավ․ ՔՊ-ն դեմ քվեարկեց․ ՏԵՍԱՆՅՈՒԹ
Քաղաքականություն
30.04.2024 | 10:50
Խորհրդարանը 51 դեմ ձայնով մերժեց «Հայաստան» խմբակցության ներկայացրած Հայաստանի և Ադրբեջանի միջև սահմանազատման և սահմանագծման հայտարարության նախագիծը նստաշրջանի օրակարգում ընդգրկելու հարցը։ Նախագիծն ԱԺ նիստում ներկայացրեց «Հայաստան» խմբակցության պատգամավոր Արթուր Խաչատրյանը։
Նախագծի համաձայն՝ ընդդիմությունը կողմ է, որ լինի սահմանազատում, սակայն, ըստ նրանց, դրա հիմքը պետք է լինեն 1993 թվականից փաստացի գործող սահմանները։
Ընդդիմության ներկայացրած նախագծում ասվում է, որ միայն վստահության մթնոլորտի ձևավորումից հետո պետք է իրականացվեն սահմանագծում և սահմանազատում, այլ ոչ թե ուժային ճնշումների և սպառնալիքների միջոցով։ Ըստ նախագծի՝ առաջին հերթին Ադրբեջանի ԶՈւ-ն պետք է լքի Հայաստանի ինքնիշխան տարածքները, իսկ պաշտոնական Բաքուն դադարեցնի ագրեսիվ հռետորաբանությունը, ինչպես նաև վերադարձնի հայ ռազմագերիներին։
«Նախագծի մեկ այլ կետով էլ սահմանազատման ժամանակ ելակետ պետք է լինեն 1993 թվականի սեպտեմբերին ԱՊՀ-ին անդամակցելու պահին Ադրբեջանի փաստացի սահմանները, այսինքն` շփման գիծը, քանի որ ԱՊՀ-ին անդամակցությունը սահմանազատման և սահմանագծման առաջնային հիմքն է։ Բացի այդ, ահմանազատումը պետք է տեղի ունենա միջազգային փաստաթղթերի՝ ՄԱԿ-ի կանոնադրության, Վիեննայի կոնվենցիայի, Հելսինկիի եզրափակիչ ակտի հիման վրա՝ որպես ուղենիշ ունենալով ԵԱՀԿ քարտուղարության կողմից մշակած փաստաթուղթը սահմանազատմանև սահմանագծման վերաբերյալ»,- նշված է «Հայաստան» խմբակցության ներկայացրած նախագծում։
Մանյա Պողոսյան
