Թբիլիսիում բազմահազարանոց բողոքի ցույց է անցկացվել «օտարերկրյա գործակալների» օրենքի դեմ, ոստիկանությունն արցունքաբեր գազ է կիրառել. ՏԵՍԱՆՅՈՒԹ

Թբիլիսիում կիրակի օրը՝ ապրիլի 28-ին, բազմահազարանոց բողոքի ցույց է տեղի ունեցել ընդդեմ «օտարերկրյա գործակալների մասին» օրենքի։ Հանրահավաքի ժամանակ ցուցարարները բախվել են ոստիկանության հետ, ուժայինները արցունքաբեր գազ են կիրառել, հայտնում է Current Time-ը։
Ընդդիմությունը ցույց է կազմակերպել այն բանից հետո, երբ  իշխող«Վրացական երազանքը» հայտարարել է 100 հազարանոց հանրահավաքի մասին՝ ի պաշտպանություն օրենքի։ Հաղորդվում է, որ իշխող կուսակցությունը մարզերից աջակիցներ է մոբիլիզացնում: Ակնկալվում է, որ խորհրդարանական մեծամասնության ներկայացուցիչները օրինագիծը երկրորդ ընթերցմամբ կընդունեն ապրիլի 30-ին։
Ակցիան սկսվել է Հանրապետության հրապարակից, որից հետո ցուցարարները Ռուսթավելի պողոտայով շարժվել են դեպի խորհրդարանի շենք։ Երթի մասնակիցները վանկարկել են «Ո՛չ ռուսական օրենքին» և իրենց ձեռքներին ունեցել են Վրաստանի և Եվրամիության դրոշները։ Խորհրդարանի շենքի վրա տեղադրվել է «Ռուսաստանը օկուպանտ է», «Աբխազիան Վրաստան է», «Սամաչաբլոն Վրաստան է» գրությունները։
Խորհրդարանի շենքը շրջափակվել է ոստիկանների կողմից։ Անվտանգության ուժերի հետ բախումներ են տեղի ունեցել այն բանից հետո, երբ ցուցարարները փորձել են ճեղքել ոստիկանական շղթան և բարձրանալ բեմ, որը տեղադրվել էր իշխող կուսակցության կողմից օրինագծին աջակցելու համար նախատեսված հանրահավաքի համար:

Ազատության հրապարակում և խորհրդարանի շենքի մոտ մոբիլիզացվել են հատուկ նշանակության ստորաբաժանումներ և ջրցան մեքենաներ։

«Չնայած իրավապահների բազմաթիվ կոչերին՝ ցուցարարները բազմիցս փորձել են ճեղքել ոստիկանական շրջափակումը, ոստիկանությունը կիրառել է օրենքով սահմանված հատուկ միջոցներ՝ կարգուկանոն հաստատելու համար»,- ասվում է ՆԳՆ հաղորդագրության մեջ։

Բողոքի ակցիայի մասնակիցները պնդում են, որ ցուցարարների ուղղությամբ ինչ-որ գազ է բաց թողնվել։ Mapchecking.com-ի տվյալներով ակցիային մասնակցել է շուրջ 100 հազար մարդ։