Պատժամիջոցներ կիրառելու կոչերը միայն բարդացնում են Ադրբեջանի ու ԵՄ-ի հարաբերությունները․ Բաքուն քննադատել է Եվրախորհրդարանի ընդունած բանաձևը

Եվրախորհրդարանի բանաձևն անհիմն է․ Ադրբեջանի ԱԳՆ խոսնակ Այխան Հաջիզադեն այսպես է արձագանքել երկրում մարդու իրավունքների խախտումների ու բռնաճնշումների վերաբերյալ բանաձևին։

«Նման միակողմանի և կողմնակալ բանաձևերի ավտոմատ ընդունումը՝ առանց համարժեք գնահատման, վաղուց սովորական է դարձել Եվրախորհրդարանի համար։ Այս քայլը ոչ այլ ինչ է, քան Եվրոպայի մի շարք ուժերի կողմից հստակ քաղաքական պատվեր՝ ուղղված Ադրբեջանի հետ հարաբերությունների վատթարացմանը»,- ասել է նա։

Հաջիզադեն նշել է, թե նման իրավիճակում Եվրախորհրդարանի որոշ անդամներ, իբր, «առաջնորդվելով իրենց սեփական նկատառումներով և անձնական շահերով, զբաղված են միայն Ադրբեջանում իրավիճակի խեղաթյուրված պատկերի քարոզչությամբ»։

«Նման փաստաթղթերի ընդունումը խրախուսողների նպատակն է՝ շեղել ուշադրությունը եվրոպական հասարակության իսկապես հրատապ սոցիալ-տնտեսական և քաղաքական խնդիրներից: Բացի այդ, Ադրբեջանի դեմ պատժամիջոցների կոչերը միայն բարդացնում են Ադրբեջանի ու ԵՄ-ի միջև հարաբերությունները։ Եվրախորհրդարանին ևս մեկ անգամ կոչ ենք անում՝ դադարեցնել միջամտությունը Ադրբեջանի ներքին գործերին և դատական ​​գործընթացներին»,- հայտարարել է Այխան Հաջիզադեն։

Հիշեցնենք՝ Եվրախորհրդարանը ձայների 474 կողմ, 4 դեմ և 51 ձեռնպահ հարաբերակցությամբ նախօրեին ընդունել է բանաձև, որով դատապարտում է Ադրբեջանի իշխանություններին քաղաքացիական հասարակության նկատմամբ բռնաճնշումների համար։ Եվրախորհրդարանի պատգամավորները կոչ են արել Ադրբեջանի իշխանություններին՝ անհապաղ և անվերապահորեն ազատ արձակել 2023 թվականի դեկտեմբերին ձերբակալված իրավապաշտպան Իլհամիզ Գուլիևին և բոլոր մյուս քաղբանտարկյալներին, այդ թվում՝ ԵՄ-ի և այլ երկրների քաղաքացիներին։

Եվրոպացի պատգամավորները նաև կոչ են արել Եվրահանձնաժողովին՝ դիտարկել «էներգետիկայի ոլորտում Ադրբեջանի հետ ռազմավարական գործընկերության դադարեցման հարցը»։ Նրանք պնդում են, որ գործընկերության մասին ցանկացած ապագա համաձայնագիր պետք է պայմանավորվի բոլոր քաղբանտարկյալների ազատ արձակմամբ և երկրում մարդու իրավունքների վիճակի բարելավմամբ: Փաստաթղթում պատգամավորները նաև կրկնում են իրենց կոչը՝ «ԵՄ-ի պատժամիջոցներ սահմանել Ադրբեջանի պաշտոնյաների դեմ, որոնք թույլ են տվել մարդու իրավունքների լուրջ խախտումներ»։

Էմմա Չոբանյան