26.06.2026 | 04:58
ԱԱ-2026. Նիդերլանդներն ու Ճապոնիան դուրս եկան փլեյ-օֆֆ. ՏԵՍԱՆՅՈՒԹ
Թբիլիսիում հերթական բողոքի ակցիան է տեղի ունեցել «օտարերկրյա գործակալների» մասին օրենքի դեմ․ ՏԵՍԱՆՅՈՒԹ
Քաղաքականություն
26.04.2024 | 11:44
Թբիլիսիում հերթական բողոքի ակցիան է տեղի ունեցել «օտարերկրյա գործակալների» մասին օրենքի դեմ։ Երեկ երեկոյան մի քանի հարյուր մարդ, հիմնականում՝ ուսանողներ, հավաքվել են Վրաստանի խորհրդարանի մոտ, այնուհետև շարժվել դեպի արտաքին գործերի նախարարության և կառավարության շենքեր, փոխանցում է Նովոստի Գրուզիան։
Ակցիայի հիմնական ուղերձները վերաբերել են Եվրախորհրդարանի կոշտ բանաձևին, որը կոչ էր անում Վրաստանի իշխանություններին հետ կանչել վիճահարույց օրինագիծը, որը «ներշնչված» է քաղաքացիական հասարակության կազմակերպությունների նկատմամբ խտրականության և ընդդիմությանը ճնշելու ռուսական գործելակերպով։
Վրաստանի վարչապետի գրասենյակում ցուցարարներին դիմավորել են ոստիկանական շարասյուները։ Ներքին գործերի նախարարության բոլոր աշխատակիցները դիմակներով են եղել։
Next destination the office of the government also guarded by the police. pic.twitter.com/iXM9QsvIAS
— Mariam Nikuradze (@mari_nikuradze) April 25, 2024
Այստեղ միջադեպեր չեն գրանցվել, սակայն Ռուսթավելի պողոտա վերադառնալուն պես ոստիկանները ցուցարարներին կոչ են արել հեռանալ ճանապարհի երթևեկելի հատվածից։ Եվրոպական դրոշներով ուսանողները, սակայն, նստացույց են սկսել՝ երգելով և բողոքի կարգախոսներ վանկարկելով։
Թբիլիսիում արդեն 11 օր է՝ շարունակվում են «արտասահմանյան գործակալների» մասին օրենքի դեմ ցույցերը։ Ապրիլի 18-ից ուսանողներն ինքնաբուխ ակցիաներ են անցկացնում՝ առանց քաղաքական կուսակցությունների և քաղաքացիական հասարակության կազմակերպությունների մասնակցության։ Նրանք պարբերաբար բողոքի երթեր են կազմակերպում դեպի տարբեր պետական կառույցներ։ Ուսանողներն ասում են՝ շարունակելու են ակցիաները, քանի դեռ օրինագիծը հետ չի կանչվել:
