16.03.2026 | 23:18
ԵՄ-ն պատժամիջոցներ է սահմանել չինական և իրանական ընկերությունների նկատմամբ՝ կիբերհարձակումների համար
Ալիևի ներկայացուցիչը հայտարարել է, թե ՀՀ-ի և Ադրբեջանի միջև խաղաղության պայմանագրի կնքման իրական հնարավորություն կա
Քաղաքականություն
24.04.2024 | 15:03
Հայաստանի և Ադրբեջանի միջև խաղաղության պայմանագիր կնքելու իրական և բացառիկ հնարավորություն է առաջացել։ BBC-ի հետ զրույցում այս մասին հայտարարել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը, գրում են ադրբեջանական լրատվամիջոցները։
Նա հերթական անգամ 2023 թվականի սեպտեմբերին Արցախում Բաքվի իրականացրած ռազմական ագրեսիան ու էթնիկ զտումը «հակաահաբեկչական գործողություն» է անվանել։
«Սահմանազատման մասին համաձայնությունը ձեռք է բերվել կողմերի միջև երկկողմանի անմիջական շփման արդյունքում և առանց որևէ երրորդ կողմի ներգրավման։ Սա վկայում է այն մասին, որ մենք ինքներս կարող ենք լուծել մեր խնդիրները։ Երկրորդն այն է, որ Հայաստանն ինքը որոշեց վերջ տալ մեր հողերի օկուպացիային, և դա արվեց ոչ թե ռազմական, այլ դիվանագիտական ճանապարհով։ Վերջին կետն այն է, որ սա ցույց տվեց՝ հնչեցված տեսակետները, թե Ադրբեջանը պատրաստվում է հարձակվել Հայաստանի վրա և մտադիր է մնացած հարցերը լուծել ուժով, չեն համապատասխանում իրականությանը»,- հայտարարել է Ամիրբեկովը։
Ալիևի ներկայացուցիչը, միաժամանակ, պահանջներ է ներկայացրել Հայաստանին։
«Պետք է փոփոխություն կատարվի Հայաստանի օրենսդրության ու Սահմանադրության մեջ, քանի որ ներկայիս տարբերակում Ղարաբաղը հայտարարված է որպես Հայաստանի մաս։ Միևնույն ժամանակ, մենք կարծում ենք, որ Հայաստանը պետք է դադարեցնի Ադրբեջանի հիմնական մասի և Նախիջևանի Ինքնավար Հանրապետության միջև ճանապարհի բացման խոչընդոտմանը։ Այդ շրջափակումը դեռ շարունակվում է»,- ասել է նա։
