ՌԴ Դաշնային խորհրդի նախագահը հանձնարարել է ՀՀ ԱԺ հարցում ուղարկել Ալեն Սիմոնյանի հայտարարությունների հետ կապված

ՌԴ Դաշնային խորհրդի նախագահ Վալենտինա Մատվիենկոն սենատորներին հանձնարարել է հարցում ուղարկել Հայաստանի խորհրդարան՝ կապված ԱԺ խոսնակ Ալեն Սիմոնյանի հայտարարությունների հետ, գրում է ՏԱՍՍ-ը։

«Ես ուզում եմ իմ գործընկերոջը՝ Հայաստանի խորհրդարանի նախագահին հարց տալ՝ ո՞ւմ անունից է նա նման հայտարարություններ հնչեցրել։ Իհարկե՝ ո՛չ հայ ժողովրդի անունից, որի հետ Ռուսաստանը դարավոր բարեկամություն ունի։ Մենք չենք կարող առանց ուշադրության թողնել նման ռուսատյաց ելույթը։ Ես գրավոր հարցում կուղարկեի Հայաստանի խորհրդարանին՝ հարցնելու, թե ո՞ւմ անունից է նա խոսել և արդյո՞ք Հայաստանի խորհրդարանը կիսում է այս հանդիպման ժամանակ հնչած գնահատականները»,- ասել է Մատվիենկոն։

Նա հույս է հայտնել, որ Հայաստանի խորհրդարանը կհարցնի խոսնակից՝ ո՞վ է նրան «իրավունք տվել Հայաստանի անունից ելույթ ունենալ այդ կերպ և նման գնահատական տալ»։

Հիշեցնենք՝ ԱԺ նախագահ Ալեն Սիմոնյանը ելույթ է ունեցել Եվրոպական միության անդամ պետությունների խորհրդարանների նախագահների համաժողովին ու նշել, որ Հայաստանը հաստատակամորեն պաշտպանում է Ուկրաինայի, ինչպես նաև Մոլդովայի, Վրաստանի, Կիպրոսի և բոլոր երկրների տարածքային ամբողջականությունը:

Նա նաև ասել է, որ Ադրբեջանն ու ՌԴ-ն Հայաստանի դեմ հիբրիդային հարձակում են իրականացնում։

«Ադրբեջանն օգտագործել է տարբեր լրատվամիջոցներ և սոցիալական ցանցեր՝ հայկական տարածքներն աստիճանաբար զավթելու համար: Տեղադրելով կեղծ տեսանյութեր, որոնք, իբրև, ցույց են տալիս հայկական զորքերի տեղաշարժը, Ադրբեջանը ձգտում է Հայաստանին ներկայացնել որպես ագրեսոր՝ հարձակման համար պարարտ հող նախապատրաստելու և սեփական ագրեսիան արդարացնելու համար: Մեր արևելյան հարևանը տեխնոլոգիաների օգտագործման հարցում միայնակ չէ: Ռուսաստանը սպառնալիքների և ապատեղեկատվության արշավ է կազմակերպում: Մտահոգիչ է, որ Ռուսաստանի կառավարության բազմաթիվ պաշտոնյաներ համարձակվում են թելադրել Հայաստանի շահերը և խոսել հայ ժողովրդի անունից»,- ասել էր Ալեն Սիմոնյանը։