Ի՞նչ է ասելու Թուրքիայի գլխավոր ընդդիմությունը Հայոց ցեղասպանության տարելիցին․ թուրք լրագրողի անդրադարձը

Թուրք հայտնի լրագրող Դողան Օզգյուդենը, որը 1971 թվականի ռազմական հեղաշրջումից հետո հեռացել է Թուրքիայից ու ապրում է Բելգիայում, Arti Gercek-ում հրապարակված հոդվածում անդրադարձել է Հայոց ցեղասպանության միջոցառումներին թուրքական ընդդիմության արձագանքին։

«Չորեքշաբթի 1915 թվականի Հայոց ցեղասպանության 109-րդ տարելիցն է՝ մեր երկրի պատմության ամենամութ էջերից մեկը։ Հուսով եմ, որ հիմնական ընդդիմադիր Ժողովրդահանրապետական կուսակցությունը (CHP), որն ընտրություններում ձայների մեծամասնություն է հավաքել, նույնպես կմասնակցի այս մութ տարելիցի հիշատակի միջոցառումներին»,- գրում է հեղինակը։

Ըստ նրա՝ CHP-ի խորհրդարանական խումբը, որը մինչև անցյալ տարի աջակցում էր թուրքական զինուժի կողմից իրականացվող պատերազմին հյուսիսային Իրաքում և Սիրիայում, այժմ նրա նոր վարչակազմն ագրեսիվ քաղաքականության դեմ պետք է հստակ դիրքորոշում որդեգրի, այն է՝ հրաժարվում է Ադրբեջանի կողմից Ղարաբաղի օկուպացիայից Ալիևի բռնապետության օրոք և հայ ազգի դեմ երկրորդ ցեղասպանությունից։

«Սակայն անցյալ շաբաթ Եվրոպայի խորհրդի Խորհրդարանական վեհաժողովում կուսակցության նոր ղեկավար Օզգյուր Օզելի ելույթը տեսնելուց հետո, ցավոք, ես չափազանց հոռետես եմ այս հարցում»,- գրում է Օզգյուդենը։

Նա նաև հիշեցնում է, որ Օզելի՝ CHP-ի ղեկավար ընտրվելուց երեք օր անց Յավուզ Դոնաթը Sabah թերթում գրել էր, որ կուսակցության նախկին ղեկավար Քեմալ Քըլըչդարօղլուի օրոք CHP-ն բավարար աջակցություն չէր ցուցաբերում Ալիևի վարչակազմին։ Այնուհետև Օզելը հայտարարել է, որ առաջին այցերով կմեկնի Հյուսիսային Կիպրոս, ապա՝ Ադրբեջան։ Նրա այցն Ադրբեջան այդպես էլ տեղի չի ունեցել։

«Անցյալ շաբաթ Ստրասբուրգում Օզելի ելույթը ցույց է տալիս, որ թեև նրա առաջնորդը փոխվել է և ընտրություններում իր հաղթանակի մեծ մասը պարտական ​​է քուրդ քաղաքացիներին, CHP-ի դասական ազգայնական և պետական ​​քաղաքականության մեջ մեծ փոփոխություններ չեն լինի»,- նշում է լրագրողը՝ հիշեցնելով, որ 2024թ․ հունվարի 24-ին ԵԽԽՎ-ն որոշում է ընդունել չվավերացրել Ադրբեջանի պատվիրակության լիազորությունները։

Քվեարկության ժամանակ Թուրքիայից քրդամետ DEM կուսակցության պատգամավոր Բերդան Օզթուրքը քվեարկել է  «կողմ», իսկ իշխող ԱԶԿ-ի 9 պատգամավոր՝ «դեմ», CHP-ի պատգամավորներից ոչ ոք չէր մասնակցել քվեարկությանը։

Նախորդ շաբաթ ԵԽԽՎ-ում ունեցած ելույթում Օզելը նույնիսկ չի հիշատակել Հյուսիսային Իրաքում և Սիրիայում թուրքական պետության կողմից իրականացվող արյունալի գործողությունները, Կովկասում Ադրբեջանի և Թուրքիայի զինված ուժերի համատեղ ներխուժումն ու մարդասպան գործողությունները։

«Կարծում եմ, որ այն գործընթացը, որը տեղի ունեցավ մեր և Ադրբեջանի միջև անցած ժամանակահատվածում, որի ընթացքում մենք քվեարկության մեջ չէինք, բայց ափսոսում ենք հետևանքների համար, պետք է արագ շտկվի։ Ադրբեջանի հետ գործընթացն ուսանելի է երկու կողմերի համար՝ արդեն իսկ տված արդյունքների առումով։ Ցանկանում եմ նաև նշել, որ մենք պատրաստ ենք ամբողջ պատասխանատվությունը ստանձնել Խորհրդի և Ադրբեջանի միջև, որը մեզ համար շատ կարևոր երկիր է, որպեսզի հետագայում լիարժեքորեն նպաստենք հարաբերությունների վերականգնմանը»,- ասել է  թուրք ընդդիմադիր գործիչը։

«Սպասում ենք։ Ի՞նչ կասի նա այս ցեղասպանության և ադրբեջանական ու թուրքական զինված ուժերի համատեղ գործողությամբ Լեռնային Ղարաբաղի հայերի ներկայիս կոտորածի ու տեղահանման մասին»,- եզրափակում է թուրք լրագրողը։

Էմմա Չոբանյան