16.05.2025 | 16:02
Նախարարն ու դեսպանը քննարկել են Հայաստանի քրեակատարողական հիմնարկներում իրենց պատիժը կրող դատապարտյալներին առնչվող հարցեր
Ասել եմ՝ ինձ այդ հանձնաժողովի խմբից հանեք․ Բաղանիսի վարչական ղեկավար
Քաղաքականություն
23.04.2024 | 11:22
Մեր դիրքորոշումը մնացել է նույնը, որը երեկ ներկայացրել ենք փոխվարչապետ, Հայաստանի և Ադրբեջանի սահմանազատման հարցերի հանձնաժողովի նախագահ Մհեր Գրիգորյանին, այս մասին Factor.am-ին տեղեկացրեց Նոյեմբերյան խոշորացված համայնքի Բաղանիս բնակավայրի վարչական ղեկավար Գևորգ Սահակյանը։
Նա ևս ընդգրկված է սահմանազատման հանձնաժողովին կից ստեղծված աշխատանքային խմբում։ Բաղանիսի վարչական ղեկավարը հայտարարեց, որ հրաժարվել է մասնակցել հանձնաժողովի խմբի հետագա աշխատանքներին։
«Լսեք թե ոնց է անցել․ մենք փշալարին չենք վստահում, իրենց այդքանն ասել եմ։ Նաև ասել եմ, որ հենց հիմա ինձ այդ հանձնաժողովի խմբից հանեք։ Եթե հայկական դիրք է տեղափոխվելու, հենց հիմա ինձ հանեք այդ հանձնաժողովի խմբից, ես ձեզ հետ քննարկելու բան չունեմ։ Ես զինվորի արյունով գծած սահմանն ուրիշ տեղով չեմ ճանաչումն»,- վրդովված ասաց Գևորգ Սահակյանը։
Փոխվարչապետ Մհեր Գրիգորյանի հետ հանդիպման արդյունքներից չկարողացանք տեղեկություններ ստանալ Ոսկեպարի վարչական ղեկավարից։ Նա հայտնեց, որ այս պահին ինքը գյուղացիների հետ շարունակում է բողոքի ակցիա իրականացնել և հարմար չէ մեր հարցերին պատասխանել։
Կիրանցի վարչական ղեկավարի հետ ևս կապ հաստատել չհաջողվեց։
Նշենք, որ երեկ երեկոյան Տավուշի մարզի վարչական ղեկավարներն ու մի քանի բնակիչներ հանդիպել են Մհեր Գրիգորյանին։ Ըստ լրատվամիջոցների՝ փոխվարչապետի հանդիպումից հետո նրանք հանդիպել են նաև վարչապետ Նիկոլ Փաշինյանի հետ։ Այս տեղեկությունը, սակայն, չկարողացանք ճշտել Նիոլ Փաշինյանի
մամուլի խոսնակ Նազելի Բաղդասարյանից, նրա հետ կապ հաստատվել չհաջողվեց։
Հավելենք, ոոր վարչապետ Նիկոլ Փաշինյանի որոշմամբ ստեղծվել է «Հայաստանի և Ադրբեջանի միջև պետական սահմանների սահմանազատման և սահմանների անվտանգության հանձնաժողովին» կից աշխատանքային խումբ։ Խմբի անդամներ են ընտրվել Տավուշի համայնքների ղեկավարները, ինչպես նաև մի քանի բնակիչներ։
Հիշեցնենք, որ արդեն մի քանի օր է՝ Ոսկապար, Կիրանց և հարակից համայնքների մի խումբ բնակիչներ շարունակում են փակ պահել միջպետական ճանապարհի Ոսկեպար-Կիրանց հատվածը՝ դեմ արտահայտվելով սահմանազատմանը։
Մանյա Պողոսյան
