ԱՄՆ Կոնգրեսն Ադրբեջանի պաշտոնյաների և բարձրաստիճան զինվորականների դեմ պատժամիջոցների օրինագիծ է ներկայացնում, այդ թվում՝ Արցախում պատերազմի համար

Մի խումբ ամերիկացի կոնգրեսականներ, Դինա Տիտուսի գլխավորությամբ, այս շաբաթ նախատեսում են առաջին անգամ  Ադրբեջանի դեմ պատժամիջոցների մասին օրինագիծ ներկայացնել։ Այս մասին ադրբեջանական Turan-ի վաշինգտոնյան թղթակցին տեղեկացրել են Կոնգրեսում իր աղբյուրները։

Այս օրինագիծը պատժամիջոցներ է նախատեսում ավելի քան 40 ադրբեջանցի պաշտոնյաների՝ բարձրաստիճան զինվորականների, դատավորների, քննիչների և այլ  պաշտոնյաների նկատմամբ, որոնք «ակտիվ դեր են խաղացել երկրում օրենքի գերակայության և մարդու իրավունքների խախտման գործում»։ Նրանց թվում են Պաշտպանության նախարարության, Գլխավոր դատախազության, Բաքվի ծանր հանցագործությունների դատարանի, Ներքին գործերի նախարարության, Պետական ​​անվտանգության ծառայության, Քրեակատարողական ծառայության, Պետական ​​սահմանային ծառայության և նախագահի աշխատակազմի ներկայացուցիչներ։

Օրինագիծը կոչ է անում նախագահ Ջո Բայդենի վարչակազմին՝ 180 օրվա ընթացքում որոշում կայացնել ԱՄՆ օրենսդրությամբ սահմանված անձանց խմբի դեմ պատժամիջոցներ կիրառել, ներառյալ՝ «Մագնիտսկու օրենքը»:

«Ադրբեջանի դեմ պատժամիջոցների վերանայման մասին 2024 թվականի օրենքն» ընդգծում է Արցախյան պատերազմը և Ադրբեջանի նախագահ Իլհամ Ալիևի կառավարության կողմից քաղաքական ընդդիմության նկատմամբ դաժան բռնաճնշումները՝ որպես ադրբեջանցիների մարդու իրավունքների հետ կապված «լուրջ մտահոգություն»:

Մասնավորապես, փաստաթղթում նշվում է ընդդիմության առաջնորդների, ակտիվիստների և կառավարության քննադատների, այդ թվում՝ Գուբադ Իբադօղլուի ձերբակալությունների մասին։ Ասվում է նաև, որ 2024 թվականի մարտի 6-ին Ադրբեջանի իշխանությունները Բաքվում ձերբակալել են վեց լրագրողների և նրանց մաքսանենգության անհիմն մեղադրանք առաջադրել՝ որպես Ադրբեջանում անկախ լրատվամիջոցների դեմ շարունակվող ճնշումների մաս:

Օրինագծում նաև խոսվում է հայ ռազմագերիների իրավունքների խախտումների մասին։ Նշվում է, որ «Ադրբեջանում ռազմագերիների և գերի ընկած քաղաքացիական անձանց նկատմամբ շարունակվող ձերբակալությունները, խոշտանգումները, մարդու իրավունքների այլ լուրջ խախտումներ լրջորեն կասկածի տակ են դնում Բաքվի հավատարմությունը մարդու իրավունքներին և արդար ու կայուն խաղաղության շուրջ բանակցելու կարողությանը»։

Օրինագծում ներկայացված 40 ադրբեջանցի պաշտոնյաների ցանկում են, մասնավորապես, Ադրբեջանի հատուկ նշանակության ուժերի հրամանտար, գեներալ-լեյտենանտ Հիքմեթ Միրզոևը, ռազմական ոստիկանության պետ, փոխգնդապետ Էլգյուն Ալիևը, Ադրբեջանի 218-րդ կոմանդո-բրիգադի հրամանատար, գնդապետ Էլշան Սանաևը, Ադրբեջանի ցամաքային զորքերի հրամանատար, գեներալ-լեյտենանտ Անվար Աֆանդիևը, Պետանվտանգության ծառայության ղեկավար Ալի Նագիևը, նախագահ Իլհամ Ալիևի աշխատակազմի ղեկավար Սամիր Նուրիևը և այլ պաշտոնյաներ։

Հավելենք, որ Եվրախորհրդարանն էլ ապրիլի 24-ին քննարկելու է Ադրբեջանում մարդու իրավունքների հետ կապված իրավիճակը։ Եվրոպացի պատգամավորները դիտարկելու են «Քաղաքացիական հասարակության դեմ Ադրբեջանում վերջին բռնաճնշումները․ դոկտոր Գուբադ Իբադօղլուի և Իլհամիզ Գուլիևի գործերը» բանաձևը։

Էմմա Չոբանյան