15.05.2026 | 11:03
Հայաստանն ու ԱՄՆ-ը քննարկել են համագործակցությունը կրիտիկական հանքանյութերի ոլորտում
Փոխվարչապետը չի մեկնի Տավուշ, համայնքապետերին է կանչել Երևան
Քաղաքականություն
22.04.2024 | 11:36
Փոխվարչապետ Մհեր Գրիգորյանը չի մեկնի Տավուշի մարզ՝ բողոքի ակցիա իրականացնող քաղաքացիների հետ հանդիպելու համար։ Այս մասին Factor.am-ի հարցին ի պատասխան տեղեկացրին փոխվարչապետի աշխատակազմից։ Հանդիպում այսօր նախատեսված է, սակայն ՀՀ կառավարության շենքում։
Կիրանց, Ոսկեպար Բաղանիս համայնքերի մի խումբ բնակիչներ և Երևանից մեկնած քաղաքացիներ մի քանի օր է՝ բողոքի ակցիա են իրականացնում Վրաստան տանող ճանապարհին՝ պարբերաբար փակելով Կիրանց-Ոսկեպար հատվածը և դժգոհելով սահմանազատման հարցում կառավարության որդեգրած քաղաքականության դեմ։ Իշխանությունը հայտարարում է, թե սահմանագծման արդյունքում Ադրբեջանին անցնող տարածքներն ադրբեջանական են, իսկ ընդդիմախոսները հակադարձում, թե հայկական են։
Նշենք, որ Հայաստանը համաձայնել է վերադարձնել Տավուշի հատվածում Ադրբեջանի պահանջած գյուղերը՝ դրա դիմաց չստանալով Բերքաբերի դիմաց գտնվող հայկական տարածքները, որոնք այժմ Ադրբեջանի վերահսկողության տակ են։
Կողմերը նշում են բնակավայրերի անունները՝ Հայաստանի կողմից՝ Բաղանիսի, Ադրբեջանի կողմից՝ Բաղանիս Այրումի, Հայաստանի կողմից՝ Ոսկեպարի, Ադրբեջանի կողմից՝ Աշաղը Ասկիպարայի, Հայաստանի կողմից՝ Կիրանցի, Ադրբեջանի կողմից՝ Խեյրեմլիի, Հայաստանի կողմից՝ Բերքաբերի, Ադրբեջանի կողմից՝ Կըզըլ Հաջիլիի միջև։ Բաքուն հենց այս գյուղերն էր մարտի սկզբին անհապաղ պահանջել վերադարձնել՝ հայտարարելով, որ դրանց պատկանելությունը կասկածներ չի հարուցում։
Նարեկ Կիրակոսյան
