22.11.2024 | 20:00
Վեթինգ՝ ըստ ճաշակի․ ԲԴԽ-ում «թունավոր» պաշտոնավարման հետքերով
G7-ի երկրներն Ադրբեջանին կոչ են անում ապահովել հայերի վերադարձը միջազգային ստանձնած պարտավորություններին համապատասպան
Քաղաքականություն
19.04.2024 | 16:29
Իտալական Կապրիում տեղի ունեցած հանդիպումից հետո G7-ի արտգործնախարարները համատեղ հայտարարություն են տարածել, որում անդրադարձ կա նաև Հայաստանին ու Ադրբեջանին։
«Մենք կոչ ենք անում Հայաստանին և Ադրբեջանին լիովին հավատարիմ մնալ խաղաղության գործընթացին՝ հասնելու արժանապատիվ և տևական խաղաղության՝ հիմնված ուժի չկիրառման, ինքնիշխանության հարգման, սահմանների անձեռնմխելիության և տարածքային ամբողջականության սկզբունքների վրա։ Մենք հիշում ենք 2023 թվականի դեկտեմբերի 7-ին կողմերի կողմից հրապարակված համատեղ հայտարարությունը և խրախուսում ենք նրանց պահպանել համագործակցության այդ ոգին իրենց հետագա փոխգործակցություններում։ Հետագա էսկալացիան անընդունելի կլինի»,-ասվում է հայտարարության մեջ։
G7-ը նաև Բաքվին կոչ է անում ապահովել Արցախի հայերի վերադարձը։
«Մենք կոչ ենք անում Ադրբեջանին՝ լիովին կատարել միջազգային մարդասիրական իրավունքով ստանձնած պարտավորությունները և խրախուսել համապատասխան քայլերը՝ ապահովելու փախստականների և տեղահանվածների անվտանգ, արժանապատիվ և կայուն վերադարձը, որոնք ցանկանում են վերադառնալ իրենց տները»,- ասվում է փաստաթղթում։
G7-ը և նրա անդամները պատրաստ են նպաստել հետագա կառուցողական շփումներին բոլոր մակարդակներում, հատկապես՝ ԵՄ-ի և ԱՄՆ-ի կողմից տրամադրված բանակցային հաստատված շրջանակում, որոնց մշտական ջանքերը բարձր են գնահատում:
«Մենք վերահաստատում ենք 1991 թվականի Ալմաթիի հռչակագրին նվիրվածության կարևորությունը, որով Հայաստանն ու Ադրբեջանը ճանաչում են միմյանց տարածքային ամբողջականությունն ու ինքնիշխանությունը։ Մենք խրախուսում ենք ավելի մեծ տարածաշրջանային համագործակցությունը և բոլոր սահմանների վերաբացումը, ներառյալ՝ Հայաստանի և Թուրքիայի միջև սահմանը»,- ասվում է հայտարարության մեջ։
