Հնդկաստանում մեկնարկում են աշխարհի ամենամեծ խորհրդարանական ընտրությունները

Հնդկաստանում այսօր մեկնարկել են խորհրդարանական ընտրությունները, որոնք լրագրողներն ու փորձագետներն անվանում են մարդկության պատմության մեջ ամենամեծ քվեարկությունը։ Դրան կմասնակցի գրեթե մեկ միլիարդ ընտրող։ Նրանք կորոշեն, թե ինչպես են բաշխվելու խորհրդարանի 543 մանդատները և ով է դառնալու վարչապետ, գրում է Indian Express-ը։

Ընտրությունները կտևեն ապրիլի 19-ից հունիսի 1-ը և բաղկացած կլինի յոթ փուլից։ Վերջնական արդյունքները նախատեսվում է հրապարակել հունիսի 4-ին։ Իշխող Հնդկական ժողովրդական կուսակցությունը (IPP) համարվում է ֆավորիտ, ուստի հավանականությունը, որ երկրի վարչապետ Նարենդրա Մոդին երրորդ անգամ կզբաղեցնի այդ պաշտոնը, բավական մեծ է։ Ընդդիմությունը ներկայացված է 28 տարբեր քաղաքական շարժումների դաշինքով։

Հնդկական ժողովրդական կուսակցության նախընտրական ծրագիրը կենտրոնացած է տնտեսական ուղղության վրա։ Մոդիի կուսակիցները խոստանում են, որ Հնդկաստանն առաջիկա տարիներին կդառնա աշխարհի երրորդ տնտեսությունը և ժամանակակից արտադրություն ապահովող համաշխարհային արդյունաբերական կենտրոն։

Ուշադրություն է դարձվում շինարարությանը, ենթակառուցվածքային նախագծերին, էներգետիկայի ոլորտի ընդլայնմանը։ Բացի այդ, Նյու Դելին նպատակ ունի ստանալ 2036 թվականին Օլիմպիական խաղերը հյուրընկալելու իրավունք։

Միջազգային հարթակում IPP-ն նպատակ ունի ստանալ ՄԱԿ-ի Անվտանգության խորհրդի մշտական անդամի կարգավիճակ: Կուսակցությունը չի շրջանցում նաև անվտանգության ոլորտը։ Մասնավորապես, պաշտպանության նախարար Ռաջնաթ Սինգհը հայտարարել է, որ Հնդկաստանը հավատարիմ կմնա միջուկային զենքի ստեղծմանը։ Նա այսպես է արձագանքել այն քաղաքական ուժերին, ովքեր առաջարկել են միջուկային զինանոցի լիակատար վերացում. Նյու Դելին այս մոտեցումն անվանում է «երկրի անվտանգությունը թուլացնելու դավադրություն»: