14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Սպահանի մոտակայքում 3 ԱԹՍ է խոցվել․ իրանցի պաշտոնյա
Քաղաքականություն
19.04.2024 | 10:57
Իրանական ԶԼՄ-ները հայտնում են, որ պայթյուններ են լսվել Սպահանի օդանավակայանի մոտ, գրում է Reuters-ը։ Ավելի վաղ հաղորդվել էր, որ Իսրայելը հրթիռային հարված է հասցրել Իրանում գտնվող օբյեկտներից մեկին։
«Այդ ձայների պատճառը դեռ հայտնի չէ, հետաքննությունը շարունակվում է՝ մինչև միջադեպի ստույգ մանրամասները պարզվեն», – հաղորդում են իրանական լրատվամիջոցները:
Իրանցի պաշտոնյան Reuters-ին հայտնել է, որ դրանք եղել են հակաօդային պաշտպանության համակարգերի պատճառով: Պետական լրատվամիջոցները հայտնում են, որ երեք անօդաչու թռչող սարք է խոցվել Սպահան քաղաքի վրա:
BBC-ի ռուսական ծառայության փոխանցմամբ ևս Իրանի իշխանությունները հայտարարել են, որ իրենք մի քանի անօդաչու թռչող սարքեր են խոցել, բայց միաժամանակ հերքել են երկրի վրա Իսրայելի հրթիռային հարձակման մասին տեղեկությունները:
«Մի քանի անօդաչու թռչող սարքեր հաջողությամբ խոցվել են երկրի հակաօդային պաշտպանության կողմից, սակայն հրթիռային հարձակման մասին դեռ տեղեկություն չկա», – գրել է Իրանի տիեզերական գործակալության խոսնակ Հոսեյն Դալիրյանը X սոցիալական ցանցում։
Իրանական Press TV հեռուստաալիքի աղբյուրը հայտնել է, որ Իրանի վրա արտաքին հարձակում ընդհանրապես չի եղել։
Ավելի վաղ CBS News-ը և ABC News-ը, վկայակոչելով ամերիկացի պաշտոնյաներին, հայտնել էին, որ Իսրայելը հրթիռներ է արձակել Իրանի ուղղությամբ։ Սպիտակ տունն ու Պենտագոնն այս լուրերը չեն մեկնաբանել։ «Մենք այս պահին մեկնաբանություն չունենք», – AFP-ին ասել է իսրայելական բանակի ներկայացուցիչը:
Հիշեցնենք, որ Իսրայելն ավելի վաղ նախազգուշացրել էր, որ կարող է հակահարված տալ Իրանին այն բանից հետո, երբ Իրանը անցած շաբաթվա վերջին հարյուրավոր հրթիռներ և անօդաչու թռչող սարքեր արձակեց Իսրայելի քաղաքների ուղղությամբ:
