12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Թուրքիայում պարենային գնաճը 13 անգամ գերազանցում է ՏՀԶԿ-ի երկրների միջին ցուցանիշը
Քաղաքականություն
19.04.2024 | 13:57
Թուրքիայում պարենային ապրանքների գնաճը փետրվարին կազմել է 71,1 տոկոս, ինչն ավելի քան 13 անգամ գերազանցում է Տնտեսական համագործակցության և զարգացման կազմակերպության (ՏՀԶԿ) 38 երկրների միջին ցուցանիշը, գրում է Turkish Minute-ը։
Ըստ ՏՀԶԿ-ի զեկույցի՝ Թուրքիան պարենային ապրանքների գնաճի ամենաբարձր ցուցանիշն է ունեցել փետրվարին կազմակերպության երկրների շարքում, որին հաջորդում են Իսլանդիան (7,5 տոկոս), Հարավային Կորեան (6,9 տոկոս) և Հունաստանը (6,7 տոկոս):
Պարենի համաշխարհային գները, որոնք աճել էին կորոնավիրուսի համաճարակի, Ուկրաինայի դեմ Ռուսաստանի պատերազմի, էներգակիրների գների աճի և կլիմայական ճգնաժամի պատճառով, անկում են ապրել, մինչդեռ Թուրքիայում գները շարունակել են աճել։
Ըստ վիճակագրության՝ փետրվարին պարենային ապրանքների միջին գնաճը ՏՀԶԿ անդամ երկրների համար կազմել է 5,3 տոկոս, եվրոպական երկրներում՝ 3,3 տոկոս, Եվրամիության անդամ երկրներում՝ 3 տոկոս։
Կազմակերպության տվյալները նաև ցույց են տվել, որ Թուրքիայի պարենային ապրանքների գնաճի մակարդակը 2023 թվականի մայիսից ի վեր աճել է 18,6 տոկոսով։ Միաժամանակ, Միավորված մետաղագործների արհմիության (BİSAM) հրապարակած տվյալները ցույց են տալիս, որ Թուրքիայում աղքատության շեմը մեկ տարվա ընթացքում աճել է 23,824 լիրայով (732 դոլար)՝ մարտին կազմելով 57,578 լիրա (1,770 դոլար):
Նշենք, որ Թուրքիայում սպառողական գների աճի տեմպերը մարտին կրկին արագացել էին՝ հասնելով 2022 թվականի նոյեմբերից ի վեր նոր առավելագույնի՝ ըստ Թուրքիայի վիճակագրական ծառայության (TurkStat)։ Մարտին գնաճը տարեկան կտրվածքով կազմել էր 68,5 տոկոս։ Սակայն ENAG-ը (անկախ տնտեսագետների խումբ) հայտարարում է, որ իրենց սեփական հաշվարկներով՝ գնաճի տարեկան ցուցանիշը կազմել է գրեթե 125 տոկոս:
Էմմա Չոբանյան
