Քաղաքականություն
18.04.2024 | 14:19
Աղդամում տեղակայված Ռուսաստան-Թուրքիա համատեղ մոնիթորինգային կենտրոնի գործունեությունը կդադարեցվի։ Ադրբեջանական APA-ի հաղորդմամբ՝ այս մասին հայտնել է Թուրքիայի Պաշտպանության նախարարությունը։
«Թուրքիայի և Ռուսաստանի միջև ստորագրված հուշագրի համաձայն 2021 թվականի հունվարի 30-ին Աղդամում ստեղծված և Ղարաբաղյան տարածաշրջանում հրադադարի ռեժիմի ու իրավախախտումների կանխման հսկողություն իրականացնող մոնիթորինգային կենտրոնի գործունեության ավարտի գործընթացը, Ռուսաստանի ու Ադրբեջանի հետ համակարգմամբ, շարունակվում է»,- ասվում է հայտարարությունում։
Նշենք, որ Թուրքիայի ՊՆ պաշտոնական կայքում այս մասին հայտարարություն դեռևս չի հրապարակվել։
2023 թվականի նոյեմբերին Թուրքիայի Ազգային մեծ ժողովը հավանություն էր տվել «Ադրբեջանում թուրքական ռազմական առաքելության գտնվելու ժամկետը ևս մեկ տարով երկարաձգելու օրինագծին»։
Նախօրեին էլ Բաքուն ու Մոսկվան հայտարարել են, որ ժամկետից շուտ սկսվել է Արցախից ռուս խաղաղապահների դուրսբերման գործընթաց։
