06.10.2026 | 15:29
Դատական նիստում հայհոյելու գործով Վարդան Ղուկասյանն արդարացվել է, որդու արարքը՝ վերաորակվել
Բրիտանիան Երևանի հետ բանակցություններ է վարում՝ անօրինական միգրանտների ՀՀ ուղարկելու հարցով. The Times
Քաղաքականություն
15.04.2024 | 12:21
Մեծ Բրիտանիան բանակցություններ է վարում Հայաստանի, Կոտ դ’Իվուարի, Կոստա Ռիկայի և Բոտսվանայի հետ՝ այս երկրներ Ռուանդայի սխեմայի օրինակով անօրինական միգրանտների ուղարկելու հարցով։ Առաջարկվում է կիրառել նույնպիսի սխեմա, ինչպիսին կիրառվել է Ռուանդա միգրանտների ուղարկելու համար, գրում է The Times-ը՝ վկայակոչելով բրիտանական կառավարության փաստաթղթերը։
Հայկական կողմի հետ բանակցությունները սկսվել են 2023 թվականի սեպտեմբերին, սակայն առաջընթաց դեռևս չի գրանցվել։
Նշվում է, որ Բրիտանիայի իշխանությունները դիմել են նաև Էկվադորին, Պարագվային, Պերուին, Բրազիլիային և Կոլումբիային, սակայն այս երկրներն ավելի «քիչ են հետաքրքրված» առաջարկվող գործարքով։ Կաբո Վերդեն, Սենեգալը, Տանզանիան, Տոգոն, Անգոլան և Սիերա Լեոնեն «պահեստային ցուցակում են հայտնվել», եթե այլ երկրների հետ պայմանավորվածություններ ձեռք չբերվեն։ Միևնույն ժամանակ, Մարոկկոն, Թունիսը, Նամիբիան և Գամբիան «ակնհայտորեն հրաժարվել են» այս հարցի շուրջ քննարկումների մեջ մտնել, նշում է թերթը։
Իսկ ինչ պայմանագիր է Մեծ Բրիտանիան ստորագրել Ռուանդայի հետ։ 2022 թվականի ապրիլին Մեծ Բրիտանիան Ռուանդայի հետ ապօրինի ներգաղթյալների ուղարկելու գործարք է կնքել: Թագավորությունը դրա համար աֆրիկյան երկրին վճարել է 140 միլիոն ֆունտ սթերլինգ: Առաջին չվերթը նախատեսված էր դեռևս 2022 թվականի հունիսին, սակայն Լոնդոնը ստիպված էր չեղարկել այն, քանի Մարդու իրավունքների եվրոպական դատարանը վճռել է, որ գործարքը պարունակում է «անդառնալի վնասի իրական վտանգ»: Մինչ օրս ոչ մի թռիչք դեպի Ռուանդա չի իրականացվել։
2023 թվականի մարտին Մեծ Բրիտանիան և Ռուանդան ստորագրել են միգրացիոն համաձայնագրի թարմացված տարբերակը։ Համաձայնագրի նոր տարբերակը, ինչպես և չիրականացված նախորդը, ներառում է Մեծ Բրիտանիայից անօրինական միգրանտներին Ռուանդա ուղարկելու հնարավորությունը, սակայն դրանում թարմացվել է երկու երկրների միջև Միգրացիայի և տնտեսական զարգացման գործընկերության մանրամասները: Թարմացված տարբերակում ուշադրություն է դարձվում Միացյալ Թագավորության Գերագույն դատարանի կողմից բարձրացված խնդիրներին։
Մասնավորապես, այն պարունակում է երաշխիքներ, որ Ռուանդան չի արտաքսի միգրանտներին իրենց հայրենի երկրներ, քանի որ 2023 թվականի նոյեմբերին Մեծ Բրիտանիայի Գերագույն դատարանը որոշում է կայացրել, որ համաձայնեցված սխեման անօրինական է, քանի որ միգրանտներին Ռուանդայից կարող են վերադարձնել իրենց հայրենիք, որտեղ նրանք կարող են ենթարկվել հետապնդումների, ընդհուպ՝ սպանությունը:
