12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Թուրքիան ՌԴ-ին և Ուկրաինային խաղաղության պայմանագրի նոր նախագիծ է առաջարկել
Քաղաքականություն
11.04.2024 | 18:33
Թուրքիան Ռուսաստանին և Ուկրաինային առաջարկել է խաղաղության պայմանագրի նոր նախագիծ, որը նախատեսում է հակամարտության սառեցում ներկայիս ճակատային գծում։ Այս մասին գրում է «Նովայա գազետա Եվրոպա»-ն՝ վկայակոչելով փաստաթղթին ծանոթ իր աղբյուրին։
Ծրագիրը ներառում է նաև 2040 թվականին Ուկրաինայում պետության արտաքին քաղաքականության վերաբերյալ հանրաքվեների պարտադիր անցկացում, ինչպես նաև հանրաքվեների անցկացում միջազգային վերահսկողության ներքո ուկրաինական բոլոր տարածքներում, որոնք կհայտնվեն Ռուսաստանի օկուպացիայի տակ պատերազմի սառեցման պահին։
Ուկրաինան, ըստ փաստաթղթի, պետք է մինչև 2040 թվականն իր ոչ դաշինքային կարգավիճակի համար երաշխիքներ տրամադրի, իսկ Ռուսաստանը պետք է հրաժարվի ԵՄ-ին Ուկրաինայի անդամակցության դեմ իր առարկություններից: Ծրագիրը նախատեսում է նաև գերիների փոխանակում «բոլորը՝ բոլորի դիմաց» սկզբունքով։
Բացի այդ, պլանը ներառում է ԱՄՆ-ի և Ռուսաստանի փոխադարձ պարտավորություն՝ ոչ մի դեպքում միջուկային զենք չօգտագործելու վերաբերյալ, ինչպես նաև Ռազմավարական սպառազինությունների սահմանափակման պայմանագրի (START-3) երկարաձգում և ապագայում միակողմանիորեն դրանից դուրս գալու անհնարինություն։
Ավելի վաղ Շվեյցարիայի նախագահ Վիոլա Ամերդը հայտարարել էր, որ հունիսի 15-16-ը Բյուրգենշտոկում կանցկացվի Ուկրաինայի կարգավորման վերաբերյալ համաժողով։ Ըստ Ամերդի՝ գագաթնաժողովին նախատեսվում է հրավիրել ավելի քան 100 երկրների, այդ թվում՝ Ռուսաստանին։ Մոսկվան, սակայն, հասկացրել է, որ շահագրգռված չէ մասնակցելու այս միջոցառմանը։
