06.10.2026 | 21:03
24 ժամ ջուր չի լինի Դիլիջանի մի շարք հասցեներում
Factor TV-ի անդրադարձից հետո ԲԴԽ-ն նախագահին առաջարկել է «Կալանքի դատարանի» ռեզերվային դատավոր Կարեն Հակոբյանին նշանակել Գեղարքունիքի մարզում
Հասարակություն
11.04.2024 | 16:25
Բարձրագույն դատական խորհուրդը նախագահին առաջարկել է «Կալանքի դատարանի» ռեզերվային դատավոր Կարեն Հակոբյանին վերանշանակել Գեղարքունիքի մարզում։ Այս մասին տեղեկանում ենք Բարձրագույն դատական խորհրդի կայքից:
«2024 թվականի ապրիլի 11-ին, դռնփակ նիստում, քննարկելով Գեղարքունիքի մարզի առաջին ատյանի ընդհանուր իրավասության դատարանի դատավորի թափուր տեղը համալրելու նպատակով համապատասխան մասնագիտացում ունեցող այլ դատարանի ռեզերվային դատավորի թեկնածությունը և ղեկավարվելով Հայաստանի Հանրապետության Սահմանադրության 175-րդ հոդվածի 1-ին մասի 2-րդ կետով, «Հայաստանի Հանրապետության դատական օրենսգիրք» սահմանադրական օրենքի 94-րդ հոդվածի 1-ին և 5-րդ մասերով, 115-րդ հոդվածի 1-ին մասի 1-ին կետով և 117-րդ հոդվածով՝ Բարձրագույն դատական խորհուրդը որոշում է․
1. Հանրապետության նախագահին առաջարկել Կարեն Ցոլակի Հակոբյանի թեկնածությունը՝ Գեղարքունիքի մարզի առաջին ատյանի ընդհանուր իրավասության դատարանի քրեական մասնագիտացման դատավորի պաշտոնի թափուր տեղում նշանակելու համար:
2. Սույն որոշման 1-ին կետով ներկայացված առաջարկի վերաբերյալ «Հայաստանի Հանրապետության դատական օրենսգիրք» սահմանադրական օրենքի 117-րդ հոդվածով սահմանված կարգով Հանրապետության նախագահի հրամանագիրն ուժի մեջ մտնելու պահից Կարեն Ցոլակի Հակոբյանի՝ ռեզերվային դատավորի կարգավիճակը համարել դադարած»,- ասված է ԲԴԽ որոշման մեջ։
Նշենք, որ Կարեն Հակոբյանը 2023 թվականի հունվարին է ռեզերվային կագավիճակ ստացել՝ այն բանից հետո, երբ պետությունը հրաժարվել է առանձին գործեր քննող դատավորների ինստիտուտից։ Մինչև 2024-ի հունվարի 23-ը Հակոբյանն առանց աշխատելու աշխատավարձ էր ստանում, սակայն հունվարին ԲԴԽ-ն նրան ու ռեզերվային կարգավիճակ ունեցող ևս 5 դատավորի առաջարկել է գործուղվել մարզեր ու աշխատել՝ առանց աշխատանք կատարելու աշխատավարձ ստանալու փոխարեն։
Factor TV-ն «Կալանքի դատարանների» վերելքն ու անկումը․ 14 դատավորից միայն 6-ն է վերանշանակվել» հոդվածում և «Ինչպես առանց աշխատելու աշխատավարձ ստանալ. մեկ տարում 113 միլիոն՝ «Կալանքի դատարանի» դատավորներին» տեսանյութում անդրադարել է ռեզերվային դատարանի դատավորների խնդիրներին՝ պարզելով, թե նրանք ընդհանուր առմամբ որքան աշխատավարձ են ստացել՝ առանց աշխատելու, ինչպես նաև անդրադառնալով հարցին, որ գործուղված ռեզերվային դատավորներն, ի տարբերություն մյուս դատավորների, ավելի ցածր աշխատավարձ են ստանում՝ խտրականության ենթարկվելով պետության կողմից։
Արաքս Մամուլյան
