Ալիևը հայտարարել է, թե ՀՀ-ԱՄՆ-ԵՄ հանդիպումը «վտանգի աղբյուր է, Ադրբեջանը մեկուսացնելու նպատակ ունի»

Ադրբեջանի նախագահ Իլհամ Ալիևը Թուրքիայի նախկին ԱԳ նախարար, ներկայում պատգամավոր Մևլութ Չավուշօղլուի հետ հանդիպմանը կարևորել է ադրբեջանա-թուրքական միասնության հետագա ամրապնդումը՝ նշելով, թե ներկայում գործընթացներն աշխարհում, այդ թվում՝ Հարավային Կովկասում, «ընթանում են շատ վտանգավոր ուղղությամբ, և Ադրբեջանն իրավացիորեն իր մտահոգությունն է հայտնում այդ կապակցությամբ, և որ Հարավային Կովկասի համար գծված պլանն ապագայում կարող է հանգեցնել մեծ աղետի»։

Նա դժգոհել է, որ Արցախում իրականացված ռազմական ագրեսիայից հետո Ադրբեջանի նկատմամբ ճնշումները շարունակվում են, մասնավորապես, Եվրախորհրդարանը բանաձևեր է ընդունել, իսկ ԵԽԽՎ-ում Ադրբեջանին զրկել են ձայնի իրավունքից, ինչի պատճառ, ըստ Ալիևի, «Ղարաբաղն ազատագրելն է»։

Անդրադառնալով այսօր Բրյուսելում անցկացվող ԱՄՆ-ի, Եվրամիության և Հայաստանի եռակողմ հանդիպմանը՝ Ալիևը մտահոգություն է հայտնել, որ այն, իբր, «վտանգի ևս մեկ աղբյուր է Հարավային Կովկասի համար»։

«Վերջին օրերին թե՛ ԱՄՆ-ի, թե՛ Եվրամիության բարձրաստիճան պաշտոնյաներն իրենց նախաձեռնությամբ տեղի ունեցած հեռախոսազրույցների ընթացքում փորձում էին մեզ համոզել, որ այդ հանդիպումն Ադրբեջանի դեմ չէ։ Սակայն մենք գիտենք, որ դա դեմ է Ադրբեջանի և Հարավային Կովկասի համագործակցությանը։ Սա բաժանարար գծեր ստեղծելու և մեր երկիրը մեկուսացնելու նպատակ ունի»,- ասել է Ադրբեջանի ղեկավարը։

Ըստ նրա՝ «անցյալ տարվա սեպտեմբերից Ադրբեջանի դեմ Եվրախորհրդարանի և Եվրախորհրդի հայտարարություններն ու Հայաստանը Հարավային Կովկասում զինված ֆորպոստի վերածելու փորձերն ապագայում մեծ հետևանքներ են ունենալու»։ Նշելով, որ աշխարհաքաղաքական իրավիճակը փոխվել է, Իլհամ Ալիևը կարևոր է համարել Ադրբեջան-Թուրքիա միությունը՝ վստահություն հայտնելով, որ այն խզել ցանկացողների երազանքներն ապարդյուն կլինեն։

Էմմա Չոբանյան