Հասարակություն
02.04.2024 | 22:12«Գոյ» թատրոնի անձնակազմն այսօր եկել էր թատրոն և փորձում էր ներս մտնել գլխավոր մուտքից, սակայն այն փակ էր։ Ինչո՞ւ է դուռը՝ կողպված, իսկ թատրոն տանող ցուցանակի տառերը՝ ջնջված. այս հարցերի պատասխանը ստանալու համար դերասաններն ու ռեժիսորները մտան Գաբրիել Սունդուկյանի անվան ազգային ակադեմիական թատրոն։
2024-ի հունվարի 30-ի կառավարության որոշմամբ «Գոյ» թատրոնի ստեղծագործական կազմը պիտի միավորվի Սունդուկյան թատրոնին։ Արդարադատության նախարարության իրավաբանական անձանց պետական ռեգիստրը «Գոյ» թատրոնը վերակազմակերպել է:
«Իրավական գործընթացներ կան, որոնք խախտվել են՝ ընդունում-հանձնում, անձնական տվյալների ձեռքբերում, իսկ Սունդուկյանում խախտումներով ձեռք են բերել ինչ-որ թուղթ ու մեզ վրա դուռ են փակում»,-ասում է «Գոյ» թատրոնի դերասան Սամվել Թոփալյանը։
«Գոյ»-ը դեմ է միավորմանը. անձնակազմն առաջարկում է իրեն հնարավորություն տալ գործունեություն ծավալել որպես անկախ թատրոն ու հենց «Գոյ»-ի բեմում: Ինչ վերաբերում է կոնկրետ այսօր ստեղծված իրավիճակին, բողոքի ակցիայի մասնակիցներին Սունդուկյան թատրոնի տնօրինությունն ասել է, որ ներս մտնելու համար «Գոյ»-ի ներկայացուցիչները պետք է անվտանգության համակարգում իրենց տվյալները լրացնեն, ինչից հետո կունենան քարտեր, որոնց օգնությամբ կարող են մտնել թատրոն:
ԿԳՄՍ նախարար Ժաննա Անդրեասյանն օրեր առաջ ԱԺ մարդու իրավունքների պաշտպանության և հանրային հարցերի մշտական հանձնաժողովի նիստում հայտնեց, որ քանիցս հանդիպել են «Գոյ» թատրոնի ստեղծագործական կազմի հետ և մի քանի տարբերակներ առաջարկել՝ հարգելով թատրոնի անդամների որոշումներն ու կարծիքները:
Գոյի կառավարման խորհրդի նախագահ Սարգիս Արզումանյանը, սակայն, նշում է, որ նախարարության հետ իրենց թատրոնի ճակատագրի հետ կապված բոլոր քննարկումները մտել են փակուղի:
Մանրամասները՝տեսանյութում։
Աննա Բաբաջանյան
