04.06.2026 | 22:22
Սամվել Կարապետյանը հաղթելու է և տեղափոխվի Հայաստան. Նարեկ Կարապետյան. ՏԵՍԱՆՅՈՒԹ
Դատախազը պահանջում է 11 տարվա ազատազրկման դատապարտել Լևոն Երանոսյանին․ մեղադրական ճառը հրապարակվեց
Հասարակություն
29.03.2024 | 18:00
ՀՀ նախկին փոխոստիկանապետ Լևոն Երանոսյանի մասով քրեական գործը մոտենում է ավարտին։ 2018 թվականի թավշյա հեղափոխության օրերին Բաղրամյան պողոտայում և Արցախի փողոցում ոստիկանների և ցուցարաների միջև տեղի ունեցած բախումների և հատուկ միջոցների գործադրման մասով հարուցված քրեական գործով այսօր ճառով է հանդես եկել մեղադրող դատախազ Շահբազյանը։ Դատախազը դատարանից՝ դատավոր Հարություն Մանուկյանի նախագահությամբ, պահանջել է Երանոսյանին դատապարտել 11 տարի ազատազրկման։
«Դատախազ Շահբազյանը, համադրելով ապացույցները, վկաների ցուցմունքները և տեսագրությունները, ապացուցված համարեց Երանոսյանին առաջադրված մեղադրանքը։ Քրեական գործի հարուցումից 5 տարի անց կարծես թե մոտենում ենք գործի ավարտին. հուսամ՝ ուշացած արդարադատության արդյունք կունենանք»,- Factor TV-ի հետ զրույցում ասաց տուժող Յուրա Սողոյանի ներկայացուցիչ Արա Ղարագյոզյանը։
Հիշեցնենք, որ համաձայն մեղադրական եզրակացության՝ Լևոն Երանոսյանը հատուկ միջոցների գործադրմամբ դիտավորությամբ կատարել է այնպիսի գործողություններ, որոնք ակնհայտորեն դուրս են եկել իր լիազորությունների շրջանակից և էական վնաս են պատճառել քաղաքացիների իրավունքներին ու օրինական շահերին, ինչպես նաև անզգուշությամբ առաջացրել են ծանր հետևանքներ։ Երանոսյանն իրեն առաջադրված մեղադրանքը չի ընդունում, հայտարարում է, որ ոստիկանության գործողությունների արդյունքում է հնարավոր եղել ապահովել իշխանության անցնցում փոխանցումը։
Ղարագյոզյանը մտահոգություն ունի, որ հնարավոր է գործը հանգուցալուծման չգնա առաջիկայում, քանի որ դատավոր Մանուկյանը հավակնորդ է հանդիսանում Հակակոռուպցիոն դատարանում.
«Առանց այդ էլ ձգձգվող քննությունը չպետք է վերսկսվի, հուսանք՝ ԲԴԽ-ն կթողնի, որ Մանուկյանն այս գործն ավարտին հասցնի, հակառակ դեպքում այս ամենի միջով ևս մի քանի տարի պետք է անցնենք, ինչը կխախտի տուժողների արդար դատաքննության իրավունքը»։
Գործով տասնյակից ավելի տուժող կա, որոնց թվում է նաև Ազգային ժողովի նախագահ Ալեն Սիմոնյանը։ Ըստ քննության՝ նա տուժել է ոստիկանության կողմից հատուկ միջոցների կիրառման հետևանքով․ 2018-ի ապրիլի 16-ին ոտքի շրջանում վնասվածք է ստացել ու տեղափոխվել հիվանդանոց։
Ռոզա Վարդանյան
