Բռնել են տաջիկներին ու մահակներով ծեծել․ ՌԴ-ում Կենտրոնական Ասիայից միգրանտները պատմում են փողոցներում ձերբակալությունների և ստուգումների մասին

Մոսկվայի Crocus City Hall համերգասրահում ահաբեկչական հարձակումից հետո Կենտրոնական Ասիայի երկրներից շատ միգրանտներ սկսել են ավելի հաճախ իրենց իրավունքների ոտնահարման բախվել: Ռուսաստանում ուժեղացել են ստուգումներն օտարերկրացիների նկատմամբ։ Դրանք իրականացվում են օրենքի խախտմամբ, պարբերաբար նշում են փաստաբանները։

Օտարերկրացիները տասնյակներով տարվում են ոստիկանական բաժանմունքներ և ժամերով պահվում այնտեղ։ Migrant.Media նախագծի լրագրողները զրուցել են նրանց հետ, որոնք արդեն տուժել են հարձակումներից։ Անվտանգության նկատառումներից ելնելով՝ հերոսների անունները փոխվել են, փոխանցում է Current Time-ը։

Մոսկվայում ահաբեկչությունը միգրանտների նկատմամբ ստուգումների ալիք է առաջացրել ամբողջ երկրում։ Ուզբեկստանից Շուխրատը պատմել է, որ անցած շաբաթվա ընթացքում անվտանգության ուժերը զգալիորեն ուժեղացրել են վերահսկողությունն օտարերկրացիների նկատմամբ։

«Մեզ ձերբակալեցին, տարան ոստիկանություն, այնտեղ ամեն ինչ ստուգեցին, մատնահետք վերցրեցին, 10 ժամ ստուգեցին մեր անձնագրերը, լուսանկարեցին, իմ հեռախոսն էլ ուսումնասիրեցին՝ բոլոր համարները, ում հետ խոսել եմ, ընդհանրապես, ամեն ինչ»,- ասել է նա։

Շուխրատը պատմել է, որ իր հետ ձերբակալվել են Ուզբեկստանից և Տաջիկստանից այլ միգրանտներ, ընդհանուր առմամբ, շուրջ 20 մարդ։ 10 ժամ անց Ուզբեկստանի քաղաքացիներն ազատ են արձակվել։ Տղամարդու խոսքով՝ ոստիկաններն ավելի կոշտ են վերաբերվում տաջիկներին։ Նրանք թողել են բաժանմունքում։

«Բռնեցին տաջիկներին, մահակներով ծեծեցին։ Մի տղա ասում էր՝ խփեցին, ոտքս ցավում է։ Սակայն ուզբեկստանցիների հետ նման բան չի եղել։ Նրանք միայն խոսում ու վիրավորում էին»,- պատմել է Շուխրատը։

Նա նաև ասել է, որ մեկ օրում իրեն ոստիկանները մի քանի անգամ կանգնեցրել են փողոցում։

«Այս իրավիճակը եղել է 4-5 անգամ։ Փաստաթղթեր ուզեցին, հարցրին, թե ինչ ազգության եմ։ Ես ասացի, որ ես ուզբեկ եմ: Հարցրին՝ «ի՞նչ կա պայուսակում, զենք կա՞»: Ես պատասխանեցի՝ «ոչ, ինձ զենք պետք չէ»։ Այսպիսով, նրանք շարունակում էին հարցեր տալ 15-20 րոպե, երբեմն՝ կես ժամ, իսկ հետո բաց թողեցին»,- նշել է տղամարդը։

Ուզբեկստանից մեկ այլ միգրանտի խոսքով՝ իրավիճակն առանձնապես չի վատթարացել։ Ֆարուխը նշել է, որ ահաբեկչությունից հետո սպասվում էր ստուգումների ավելացում։ Նա անձամբ բերման չի ենթարկվել։

Վերջին իրադարձությունների կապակցությամբ migrant.uz պորտալը հրապարակել է փաստաբանների առաջարկությունները Ռուսաստանում գտնվող միգրանտների համար։ Միգրանտներին խորհուրդ է տրվում կարգի բերել Ռուսաստանում օրինական գտնվելու վերաբերյալ փաստաթղթերը, պարբերաբար ջնջել հեռախոսի, նոութբուքի և այլ սարքերի բրաուզերի պատմությունը, ավելի հազվադեպ հայտնվել հասարակական վայրերում՝ մինչև իրավիճակը հանդարտվի, պահպանել շփումը մտերիմների հետ, արտակարգ իրավիճակների համար պահպանել դեսպանատների և հյուպատոսությունների համարները։

Ավելի վաղ իրավապաշտպանները հայտնել էին, որ ահաբեկչությունից հետո առաջին օրերին իրենց դիմել են հազարավոր միգրանտներ, որոնք բախվել են ուժայինների կողմից ստուգումների խնդրի։