Գերմանիայի նախկին կանցլերը հայտարարել է, որ Պուտինի հետ իր մտերմությունը կօգնի դադարեցնել Ուկրաինայում պատերազմը

Գերմանիայի նախկին կանցլեր Գերհարդ Շրյոդերը նախկինի պես կարծում է, որ ՌԴ նախագահ Վլադիմիր Պուտինի հետ իր բարեկամությունը կօգնի վերջ դնել Ուկրաինայում պատերազմին, գրում է DW-ի ռուսական ծառայությունը։

«Մենք երկար տարիներ լավ համագործակցել ենք, միգուցե դա դեռ կարող է օգնել բանակցությունների սեղանի շուրջ լուծում գտնել, քանի որ այլ լուծում չկա»,- ասել է նա dpa-ին տված հարցազրույցում։

Շրյոդերը Պուտինի հետ մտերմացել է 1998-2005 թվականներին Գերմանիայի կանցլերի պաշտոնում և ներկայում աշխատում է «Հյուսիսային հոսք» գազատարի ընկերությունում, որը հիմնականում գտնվում է Ռուսաստանի վերահսկողության տակ:

Թեպետ Շրյոդերը ռուսական ներխուժումն Ուկրաինա անվանել է «ճակատագրական սխալ», նա այդպես էլ չի հեռացել Պուտինից։ Ուստի Գերմանիայի Սոցիալ-դեմոկրատական ​​կուսակցության ղեկավարությունը խուսափում է նրանից, սակայն չի հաջողվել հեռացնել կուսակցությունից։

Հարցազրույցում Շրյոդերը հիշեցրել է «Պուտինի հետ իր հարաբերությունների դրական արդյունքների մասին»: Հարցին՝ ինչո՞ւ է նա, չնայած տասնյակ հազարավոր զոհերին և Ռուսաստանի ռազմական հանցագործություններին Ուկրաինայում, շարունակում բարեկամությունը Պուտինի հետ, Շրյոդերը պատասխանել է, որ «այդտեղ գործում է մեկ այլ հարթություն»:

«Ժամանակին արդեն եղել է զգացողություն, որ այս անձնական հարաբերությունները կարող են օգնել լուծում գտնել քաղաքականապես չափազանց բարդ այս խնդրին, հետևաբար, ես բացարձակապես սխալ եմ համարում մոռացության տալ այն բոլոր դրական պահերը, որոնք եղել են մեր միջև անցյալում քաղաքական կյանքում»,- ասել է նախկին կանցլերը:

Շրյոդերը, ըստ երևույթին, նկատի ունի իր միջնորդական առաքելությունը 2022 թվականի մարտին, որը հաջողությամբ չի ավարտվել։ Այժմ նա հանդես է գալիս կառավարության մակարդակով նոր միջնորդական նախաձեռնության մեկնարկի օգտին:

«Ֆրանսիան և Գերմանիան պետք է նախաձեռնողականություն ստանձնեն այս հարցում: Ակնհայտ է, որ պատերազմը չի կարող ավարտվել կողմերից ոչ մեկի լիակատար պարտությամբ»,- ասել է Շրյոդերը՝ շահարկում անվանելով այն, որ Պուտինը կարող է միջուկային պատերազմ հրահրել կամ հարձակվել ՆԱՏՕ-ի երկրի վրա նրա արևելյան թևում:

«Որպեսզի իսպառ վերացնենք էսկալացիան, որը կարող է հանգեցնել նման սցենարների, և ավելի չբարձրացնենք բնակչության անհանգստությունը, պետք է լրջորեն մտածել ոչ միայն Ուկրաինային աջակցելու, այլ նաև հակամարտությունը կարգավորելու մասին»,- հայտարարել է Գերմանիայի նախկին կանցլերը։